阿健網誌│「老細車」?大晒呀?

Angelina

-空中飛傭

空中小姐,其實即係空中飛傭,只係一個在飛機上工作的傭工,你睇我好,我睇你好,其實是他也是你和我,打份工啫,得閒咪上嚟講吓是非囉。

Angelina網誌│空姐食到,你卻永遠吃不到的4款空中美食…

2014-5-25 09:49
字體: A A A

假如你家徒四壁,日日挨肚餓,我建議你可以試吓考空姐,因為空姐絕對係一份衣食無憂的工作,每日,多出來的飛機餐(包括頭等同商務艙)、畀我哋食啲組員餐、水果之類等等的食物,都堆積如山地擺在眼前任你食。基本上,除了放假的日子外,你花在食物上的開支,都會是0元。

剛入職時,每日都抱住要拯救世界的心態上班,誓要盡力解決浪費食物的問題。但係,胃只得一個,日日食來食去都係嗰幾款雞飯豬薯,無論幾偉大,都有唔想再食的一日。於是,富有想像力及學識淵博的空姐(例如Angelina),就會發揮小宇宙,利用廚房物資創作以下幾款「空中美食」:

1. 奶油豬
材料:派剩的小餐包、砂糖、派剩牛油
製法:小餐包一開二,每邊塗上大量牛油同糖,焗。有時仲可以夾雪糕
這款外脆內軟的肥物係空姐最愛,同翠WOW的有得fight,在下最高紀錄是(食完2個飯後)鯨吞四個,哈哈哈!

2. 冬蔭功杯麵
材料:杯麵、檸檬片、Tabasco、喼汁
製法:加大量檸檬片入杯麵,加熱水焗,然後在食之前,加大量Tabasco同喼汁
食厭飛機餐後另一選擇,長途機必食,又酸又辣,醒哂。係,飛機上係有Tabasco和喼汁的,一直懷疑是否只供crew 用,因為從來無人問我拎過……

3. Iced Cappuccino
材料:「無咖啡因」咖啡粉、代糖(因為較易溶)、牛奶、冰
製法:將所有材料放入杯中,蓋上另一隻杯,喪chok。喜歡的又可加雪糕。
這是在無咖啡機的老土飛機上,最原始的做法。不過,又真係成杯Cappuccino咁會有泡泡,同埋,又幾好飲喎衰鬼。(好衰架~~)

4. 普洱牛奶
材料:普洱茶、牛奶、砂糖
製法:加少量水泡普洱茶,加糖加奶。
本來想泡製綠茶牛奶的,但養生同事說綠茶太涼,女孩子不宜多喝,飲溫和的普洱吧!但我好想飲奶茶喎!咁,試下普洱牛奶囉。我們二人的創作令其他同事側目。但威逼利誘所有人試過後,大家都愛上了。比起一般紅茶,用普洱沖奶茶口感更醇和,有貢茶的味道哦!(台妹腔)然後回家Google 過,原來一直都有這種做法,蒙古人還會加牛油和鹽!

最後,請注意,以上食物只供空姐食用,請不要試圖在空中order,我係唔會整俾你架!但其實,大家亦可視以上四款為食譜,自己在家中試試也無妨哦!(台妹腔)

(圖片來源:Bubblews.com用戶 Tyzmo及masterjm)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年5月25日 上午9:49

發表評論

讀取中…
陳建平網誌│紀錄歷史的第五權──SocREC