梁敬國:其實我要多謝(曾鈺成)主席添,而家(我)通街爆紅,一朝成名

阿健網誌│「老細車」?大晒呀?

2014-5-25 09:57
字體: A A A

上星期篇深圳另類抄牌文章出街後,好多行家都問我有冇吹水呀肥仔,又問我香港可唔可以照板煮碗。我可以好肯肯定話畀大家聽冇吹水,喺內地有好多地方都可以見得到。至於香港?梗係唔得啦,香港係講法治架嘛(暫時都可以咁講),咩都要講「理由」、講「道理」,一陣畀你咁啱貼到呀邊個、呀邊個,就大鑊啦!而家香港已經變成有錢、有權勢就可以横行,由以前A1夫人坐飛機、我老豆係李龍基、高總管可以用巴士專綫入紅隧、陳謬論雙白線扒頭……唉,算吧啦,唔講喇!

講番黐玻璃,其實內地仲有用「天眼」方法嘅。內地「天眼」處處,布滿大街小巷,好多不法行為都係「天眼」監視到。如果有機會睇內地電視,差不多每日都拍攝到唔同嘅影片,好似早前電梯大便、街上偷竊等事件,亦都拍到唔少違例泊車。內地人開車違反交通條例,告票係自己查看後交罰款。如冇交,車年檢時就唔能夠出牌,司機都跟香港一樣有扣分制,但詳細就唔清楚嘞。

其實我都認為香港用「天眼」係可行嘅,你睇吓銅鑼灣、灣仔、中環,違例泊車多到暈,時時導致交通嚴重擠塞,如果實行用「天眼」,第一個要裝係喺皇后大道中置地文華至中環中心,唔使多講,日日都大塞車;第二係中環中國旅行社,門口巴士站再加上違例泊車,每朝車龍直達銅鑼灣;第三係中環己連拿利,早上十一時及下午四時,兩排老細車喺度等老細食飯同收工,周時車龍直達干德道及羅便臣道。有咗「天眼」,就可影低後,直接寄告票畀車主,以收阻嚇作用。

點解我喺度發咁多噏風?因為違例泊車真係好討厭,佢哋搞到大塞車,對揸車搵食嘅我,唔單止浪費時間,更直接影響我嘅收入。希望政府真係「認真」諗多啲辦法去解決道路上嘅問題啦。

(不過,到今時今日政府想解決三條隧道嘅問題,都搞咗咁多年……唉!我哋都係自求多福算吧了!)

(亞視截圖)

請支持我們持續發展,透過PayPal或其他方法贊助我們!
金額:
分類:|發表於2014年5月25日 上午9:57

發表評論

讀取中…
Angelina網誌│空姐食到,你卻永遠吃不到的4款空中美食…