影子學生—教育生態病倒了|全民教育局HKEd4All

謝頌昕

-呃你十年

人,最易寫,又最難寫。即管寫寫看,說中了,就俾個LIKE;說不中,就當我呃你十年吧!

《廣播道軟硬殺人事件》,我係咁聽嘅(1)|謝頌昕網誌

2017-9-10 21:00
字體: A A A

早兩個星期講過聽廿幾年來聽軟硬天師《廣播道軟硬殺人事件》嘅故事後,意欲未盡,遂首歌講。

《廣播道fans殺人事件》
大碟主打歌,當年一推出時播到街知巷聞,不知道歌詞咩意思,都識得幾句,主要係「XXX我支持你」啦。後來再聽,就知是為咗諷刺歌迷。不過近日聽來,整張碟最沒興趣嘅就係呢首歌,與其他歌相比,抽水味甚濃,笑過就算,隔幾年聽返已冇乜感覺。追星?睇佢instagram咪算囉。

《點解要大家笠》
緊接主打歌,自然會聽埋。因隔離屋哥哥個花名同撞咗首歌其中一個字,所以幼稚園識字有限,都會唱呢首歌,同埋阿葛頭嗰幾句「我un un….un un!’拿拿拿,人人人人無啦啦話呢支歌好聽」,確實係好抵死。我一直相信,首歌個「笠」字係「love」咁解,早幾日聽返,又發現原來有另一個意思,但按返我之前廿幾年嘅理解(即係「Love」),又錯唔晒喎!頂,廣東話就係咁博大精深。

《請勿客氣》

又係啦,緊接再緊接主打歌吖嘛,咪聽埋囉。係知有王靖雯,但一嚟副歌,仲要唱得鬼咁快,真係唔係唱緊乜。後來最先聽得明,都係王靖雯負責的部份「別客氣可否別客氣 跟愛人揭秘 說一句極愛你 如愛他 不必神秘 高聲直說嘛 說一句極愛你 yeh!」OK,以為又是一首情歌囉,不過再聽,咦,唔止情情塔塔咁簡單喎,男女老幼通殺喎!
嗱,呢首就同《廣播道fans殺人事件》唔同喇,廿幾年後聽返一樣啱用,唯一嘅分別,可能係嗰個慘成替死鬼嘅通訊方式,「淨係識得同人煲電話粥/ICQ/MSN/SMS/fb/WhatsApp/instagram」…..

《中國製造》
之前都講過,中學年代以背得晒成首歌為榮。拎返入面啲名去問同我差不多歲數或細些少嘅,識到一半都好好,體操王子、陳沖、北京蜂皇精、周口店、張浚生、特異功能、中僑、裕華…咩嚟嘅?
而家聽返,首歌出現過嘅名詞當然近9成都out晒,但當歷史紀錄咁去聽,其實好趣,唔止抽水咁簡單(嗱,我又拎《廣播道fans殺人事件》出嚟鞭屍喇)。不過首歌舖排上其實係有啲心思,一開始話「奴隸們起來 起來 不要說我們一無所有 我們要做天下的主人」,到最後就話「一無所有 十二億人 抽煙痰罐 幹部高官 安定繁榮 希望工程」。
忽然想起達明每幾年reloop一次嘅《排名不分先後左右忠奸》(今年呢首我又係識背)。

《鈴通天地線》
呢首歌夠晒pop,唔理歌詞當一般流行曲去聽都夠玩,加埋歌詞就更抵死。呢首歌當然有啲位out咗,例如「攤開本書 溫到好多個知已 一七三 一七三 一七三二四」,而家要交友,搵個手機手搖一搖咪得囉,173?我個年代喎!不過同《請勿客氣》一樣,廿幾年後聽返都啱使,一班陌生人對住個電話筒,點解可以講咁多心情或交流想法?同屋共住嗰個有冇知咁多?
話分兩頭,早兩年知名婚外情網站Ashley Madison被黑客攻入,發現九成半女用戶其實都係虛構出嚟,呢個網站大部份真實會員都係「巴打」。當時我都話,入面不少虛構絲打其實都係同「173」熱線入面嘅人妻少婦咁,來來去去都係嗰幾個。所以咪話呢首歌廿幾年後聽返都一樣中,又係個通訊形式唔同咗而已!

先講住五首,有時間再續。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2017年9月10日 下午9:00

發表評論

讀取中…
【一路向北】醫療:港醫療體系仍待解決 惟政府籲本地機構把握機遇北上發展