地牛翻身｜生活旅客博客

3月20號下晝大約5點幾，坐喺梳化上嘅我經歷咗生平第一次嘅地震，持續約5秒，臺灣叫做「地牛翻身」。

當時嘅感覺係小小搖晃，由底而上，更感覺聽得到嘅地動嘅隆隆聲，真係好可怕吓。

其實臺灣尤其東部山區係經常都會地震。今年立春都震過，重好嚴重，但當時高雄並未太感覺到，而今次嘅震源都係喺東部，強度5點幾級，高雄就受到牽連，震度有3級。

講起上嚟好奇怪，每次地震時天氣都會幾「反常」， 立春時嘅地震碰啱臺灣嘅特大寒流，亦有傳聞話有啲地方嘅居民睇到「地震雲」嘅奇異天象。而今日嘅地震，由早到晚都有啲異於平常嘅天氣 ~ 一早6點開始落大雨（這邊通常都係傍晚或夜晚至落雨）， 到8點幾又放晴，但都有雨雲，好唔穩定。黃昏地震時嘅天色有些小暗橙色，有別於平日亮麗橙嘅顏色。

震後嘅夜晚天氣急促轉涼，月亮彎而明亮，希望聽日天氣好返，地震亦完全過去吧。

諗番香港，的確係福地，唔會有咩地震之類咁震撼嘅天災。即使颱風，近10幾年嚟都好似影響唔大，能夠安然度過，唔知係咪真係多得「李氏力場」罩住？而家李生退休，繼任人唔知守唔守得住個場啦……

其實人定又點能夠勝天？珍惜上天嘅恩賜，做好本份，減少人禍，就係保守天賜福份嘅最根本之道。

地震之後嘅一日，天朗氣清，涼風送爽，响巷子內穿梭踩單車，居然有種「劫後重生」嘅感覺，真夠誇張。

都係嗰句，願天佑香港，天佑臺灣。當然，最重要都係要「感恩和惜福」。

2018. 3. 29

由於臺灣經常地震，感覺住透天厝比較安全。

這邊平日嘅黃昏都好亮麗。 但地震嗰日嘅黃昏就有啲暗橙色。可惜冇影低。

地震之後嗰日，天朗氣清。喺巷中踩單車，忽然有種「劫後重生」嘅感覺。