譚耀宗:咁樣搞落去的話,我諗香港就混亂架喇。

阿健網誌│聽錯咗嗰客要去嘅目的地,結果…

2014-6-8 14:00
字體: A A A

呢個禮拜真係多嘢發生,又槍擊、又飛虎隊、又殺嬰,心情都唔太好過;加上六四25週年,有超過18萬人聚集維園悼念,心情更加沉重。時間過得真係快,眨吓眼已25年,我由年輕人已變成中年人,呢一個平反夢,希望唔使等到百年歸老啦。

講完啲咁沉重嘅嘢,又同大家吹吓水先。今次想同大家講吓做司機一定曾經有過嘅一種經歷,就係去錯目的地。好多時去錯地方都係因為聽錯,就好似有個行家喺機場接咗個乘客,話去海濱道,到咗荃灣海濱道,先知道個客原來想去尖沙咀嘅海濱長廊。另一個行家就試過早上5點喺尖沙咀,朝早開工嘅第一支旗,車咗一名醉酒客,話要去田灣,而個乘客上車後已經瞓着咗,當差不多去到田灣,問佢喺邊度落車,佢好似如夢初醒咁……

「你車我去邊呀!」
「咪田灣囉。」
「我去荃灣,你車我去田灣做乜呀!!」

行家知道搞錯咗,嗱嗱林車返佢去荃灣,仲耍晒冧添,結果連隧道費都蝕埋呀。

其實,我都有試過架…

仲記得我初入行嘅時候,車一個客去新都城,後來先知道新都城有一個喺北角,有一個喺將軍澳,結果當然被罵到狗血淋頭啦。其實香港都有啲街道名都好似架,唔小心真係隨時搞錯,例如崇德街,一條喺灣仔,一條喺大埔,仲有個崇德圍係油塘添。如果你去銅鑼灣山,記得講清楚,唔係車咗你去Causeway Bay呀,銅鑼灣山其實喺沙田架!

另外,我哋做司機,咩語言都識少少有著數,普通話、英語都要識啲啲,英語又分美國人的、法國人的、日本人的、韓國人的,還有菲律賓的,有機會同大家分享一下我哋遇到嘅英語趣事啦。

(《蘋果日報》圖片)

 

請支持我們持續發展,透過PayPal或其他方法贊助我們!
金額:
分類:|發表於2014年6月8日 下午2:00

發表評論

讀取中…
即時關注│傅振中帶鎅刀踩場 抗議《城市論壇》講六四