游清源網誌│游清源網誌│致全港市民的私人公開信

史物夫網誌│國富論│賭徒與騙徒

2014-6-10 10:00
字體: A A A

歐洲央行真係行負利率,人民銀行又堅係想避過六月必然錢荒嘅厄運。So what?個市一樣水盡鵝飛。人哋印銀紙係玩貨幣戰爭,香港綁死美金,呢個初夏股市生意淡薄,好彩世界杯開鑼,一眾炒友仍然有地方落注。

炒友當中,又分專業賭徒同業餘賭徒。業餘賭徒嘅世界觀好簡單,同桂神講十二碼一樣,一係中,一係唔中。職業賭徒就唔同,落注未必因為覺得隊波會贏,而係覺得盤路有值博率。如果你明白值博率係乜,你已經晉身專業賭徒行列;當然,專業都有水平高低之分,水皮嘅專業賭徒,一樣經常捉錯路計錯數,輸錢多贏錢少。

專業賭徒未必一定贏錢,但明知有風險,至少唔會輸到一去無回頭。師傅教落,過大海搏殺有三大戒條:一,袋穩身份證。二,買定回程船飛。三,輸錢千祈咪諗往問大耳窿借錢返本。手風唔順,就忍下。帶得幾多去搏殺,輸清光,都要認命。限注,乃係專業賭徒最基本常識。呢三大戒條,同樣適用於出入中環。

好多人以為,做賭徒必然為賺大錢。老實講,偷呃拐騙,樣樣都好搵過賭,真係想搵錢,就唔會去做賭徒。依本少爺多年近距離觀察,賭徒最深層次動機,係要證明畀全世界知,自己叻過晒全世界;所以賭徒最鍾意聽個句就係:「賭場專收叻仔!」皆因贏錢事少,肯定自己眼光舉世無雙先係重點。

出於好勝心去賭,輸極有個譜。最怕係有人以自為有條絕世屈機方,諗住可以靠賭開飯。有冇人可以靠賭開飯?有,開賭就可以靠賭開飯。對其他人,賭,係娛樂,係滿足好勝心。所以,有人諗到,話教人必勝賭術去搵錢;賭人地錢,梗係必賺啦,出錢個位,咪受晒的風險囉。呢一點,炒友界入面既專業賭徒,一定最清楚,畢竟,成個中環都係咁樣生存。

臨近世界杯,Facebook見到唔少呢類「必勝波籃」既Post,明顯係搵食集團出歿注意。不過,賣一條橋,又搵到幾多吖?真係食大茶飯個班大蠱惑,連條「必勝波籃」都免費贈送,搵真銀,梗係靠收外圍啦!嫌唔夠,再做埋放數;通常呢的搵食集團,都係一條龍服務,由教賭,到收外圍加放數,業餘賭徒好認真咁去鑽研,佢地就坐定定等你班傻仔落搭。

其實乜野倫敦金、日本紅豆,全部都係呢一招,換個包裝,又得咗。所以話,真係想賭股票,去銀行開個戶口啦,學乜野人賭黑期?賭波,細細地去馬會買張飛,贏咗咪影張相貼上Facebook囉;唔通真係將外圍佬張集數紙公諸於世咩!再講,黑期又好,外圍又好,你輸,佢地追到你天腳底都追,佢地輸,唔賠畀你,你有冇人地咁疊馬,咁勇武先?

 

(作者:史物夫)

請支持我們持續發展,透過PayPal或其他方法贊助我們!
金額:
分類:|發表於2014年6月10日 上午10:00

發表評論

讀取中…
英文美語要識分 港式用法須留神