即時關注│泛民部署反擊吳亮星 即場踢爆疑違會議程序

Keyman馬啟仁

-Keyman世界波

2014年世界盃無綫主持,記者出身,1995年起於有線電視展開體育賽事評述及主持生涯,一直致力透過各種自己力所能及的途徑,推動不同的本地體育項目。

Keyman馬啟仁網誌│Keyman馬啟仁網誌│Keyman世界波:「討價還價」同「趁火打劫」嘅巴西版

2014-6-12 22:16
字體: A A A

世界盃開波,係一個好機會好好畀大家去學習吓經濟學,點樣叫做討價還價嘅好時候嘞。

喺巴西另一邊睇波嘅香港呢,其實都已經要面對好多討價還價嘅情況啦:因為依家都冇免費午餐,大家睇電視都要搵個靚價嚟開個package嘅,係咪?咁你情我願,都好合理嘅。

但係講到巴西呢一邊呢,確實又係喺現場先會感受到,乜嘢都係錢呀!

即是由於呢個世界盃殺到,百物騰貴,就唔在講嘞;遊客或者嚟做嘢嘅,無得傾啦!你要嚟,就要畀錢啦!

咁但係巴西嘅市民呢,亦都好明白呢一個講價之道架!所以呢,喺世界盃即將舉行,以及相信喺舉行嘅時候呢,呢啲討價還價嘅場面,就將會繼續出現。首推嘅,當然就係佢哋嘅地鐵啦!

咁地鐵呢件事呢,係喺世界盃之前,就已經拖拉咗好幾次。話要加人工啦,如果唔係就罷工啦,結果就加人工,又未得,於是後又罷咗工;咁但係又恐嚇炒啲人,又真係炒咗啲,結果又復工。咁所以見到呢,呢個主客之間嗰個拉扯呢,其實都幾緊張刺激架。

咁佢哋嘅地鐵之外呢,仲有教師呀、警察呀,大家都各自有唔同嘅party,趁住世界盃期間,就梗係討價、還個價啦。喂!因為如果依家時候唔同你講價,世界盃一開呢,或者世界盃一完咗,你想再講價都睬你啦!睬你都儍。

咁其實,每個人都有個價嘅。你喺適當嘅時候嚟個討價還價,都相當合理嘅。當然,好聽啲,就係盡量爭取表現,嚟攞好啲個價錢啦;呢方面呢,就要留意吓各位嘅超級球星,或者係準超級球星,喺世界盃期間,尤其係未出到位果啲,更加應該係會爭取多啲表現呢,博能夠一登豪門,係咪?

之不過,若果係一啲已經上晒位,啲價已經去到頂級嘅時候,你又再想討價還價呢,就至怕你有心無力嘞;所以好多出名嘅球星,其實嚟到啲大賽打到咁多呢,都已經見到好多時係力不從心,未必可以好似大家期望咁,打得咁好嘅。

最後講多句,討價還價呢樣嘢,我始終認為,一個商業世界,係有佢嘅原則嘅:咁所以,有供有求,大家好合理,睇吓邊個喺講價嘅時候,擁有多啲嘅理據去支持嘅啫。

不過最乞人憎嘅,就係嗰啲唔係討價還價,而係呢趁住呢個風頭火勢嘅時候,索性嚟打劫一番嘅朋友。唔係講笑,佢真係打劫架!

因為我哋喺噚日就遇到一啲香港嚟嘅球迷過嚟睇波,興高采烈,大家圍埋一齊影相呀,訪呀問呀咁樣之際,跟住其中一位叔叔就話嘞:「咦!我個電話呢?」
原來大家攬攬抱抱之際,已經小手出現咗,將佢嘅電話攞走咗。

呢啲提防小手呢,真係喺巴西嘅時候成日提住嘅。因為巴西人除咗叻討價還價,趁火打劫方面,都相當唔錯架!

 

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年6月12日 下午10:16
  • Keyman世界波

發表評論

讀取中…
逆嘶亭網誌│逆嘶亭網誌│逆鱗而上:香港特別行政區,特別低等,特別可憐