雙十｜生活旅客博客

剛剛第一次喺臺灣渡過雙十國慶。

對於我嚟講，雙十係有好特別嘅意義 ~ 我媽媽，我嘅鋼琴老師，同一位喺臺灣幫咗我好多嘅朋友，都係雙十節生日。

媽媽當然唔使講，冇雙十出世嘅佢，就唔會有我。

我嘅鋼琴老師，叫雙雙，係我N年前喺上海工作時，為咗重拾兒時半途而廢咗嘅學習，就喺週末到屋企附近嘅一個音樂中心學返琴。教我嘅「老師」其實只係個 20零歲讀緊大學嘅「𡃁妹」咁當然佢嗰陣已經係8級高手。 佢最鐘意教我彈Richard Clayderman嘅經典名曲《Ballade pour Adeline》，而我就介紹佢認識我嘅英國同事，幫佢補習英文。後嚟我離開上海，大家就冇咩再聯絡。直到前兩年，透過嗰位共同朋友嘅英國舊同事聯絡返，佢已經係一位嫁咗畀越南音樂界年輕俊傑兩子之母。當年嘅「𡃁妹仔」亦已經成為一位年輕貴婦啦。

重有位係喺臺灣幫咗我好多，指點咗我好多「迷津」嘅朋友，叫愛愛，住喺臺中，所以今年雙十，我就趁佢有一日假，由高雄北上臺中同佢聚吓。我這位朋友，好叻、好能幹、個性爽朗，同佢傾計好開心，亦獲益良多。

我到臺中係晏晝，同朋友喺酒店集合，佢就帶我食咗餐好地道美味嘅豬腳同鹵菜，之後我哋又一齊去一間認識嘅寵物酒店探狗仔朋友，行公司，而晚餐就再加一位都咁啱喺高雄到臺中嘅朋友一齊食，人多，有傾有講，係好愉快嘅時光。

講返雙十，臺灣──由高雄至臺中沿路並冇咩國慶氣氛，街道亦冇咩掛旗，聽講係執政民進黨對雙十並唔係太重視。尤其南部，對有國民黨色彩嘅中華民國都唔係太有興趣……唔知係唔係真。不過無論如何，這種比較「順其自然」冇太刻意造作嘅氣氛， 又的確比起香港近年忽然興起嘅 十一 形式「愛國主義式國慶」令人更加舒服自在多了。

2018. 10. 11

雙十國慶，由高雄至臺中都唔係太有咩國慶氣氛。主要街道亦冇咩旗海飄揚嘅情境。

偶然見到喺街角一隅掛住嘅青天白日旗，掛喺條柱後面，感覺掛得有啲兜踎。

雙十到臺中，朋友帶我食咗間著名豬腳鹵菜店阿水獅，非常好味道。