【嶼山填海】湯家驊指曾蔭權政府令香港房屋短缺 填海反對聲音無事實支持

全民教育局HKEd4All

-教育路

教育是以民為本,我們一群有心的老師創立「全民教育局」,以專業論教育,全民參與,集思廣益,為制定教育政策出一分力。

明日大嶼還是明日玩完?|全民教育局HKEd4All

2018-10-21 18:00
字體: A A A

十月十六日星期二晚,我同我老友阿堅、阿強同阿祥三個為慶祝當日朝早成功番工,就去咗西九龍高鐵站旁邊嘅平民區打邊爐。

「我住將軍澳,樓下就係地鐵站,上次山竹之後無巴士,但至少地鐵正常吖!今朝無地鐵!我唯有搭巴士過海啦,點知有交通意外,我未試過返工要咁耐㗎!果下我覺得將軍澳應該『獨立』囉!」喜歡睇電影嘅阿強,因為對法國電影嘅情意結,所以當年一聽到康城兩個字,掩住個鼻都要搬入將軍澳。

「我夠慘啦!冇地鐵冇的士,巴士又塞車,結果三個鐘先番到office,好彩我今日上晝無堂咋!」教專上院校嘅阿堅係飄流教師,無房屋福利,更唔好講有宿舍住。

「你幾個邊夠我辛苦?我今朝腳痛,雖然請咗假,但都要有車俾我睇醫生先得㗎!」阿祥越講越激動:「但係今朝落雨呀!的士又無,Call uber 由大窩口落仁濟醫院竟然要一舊水!唔通打999咩!我痛足成朝先等到的士咋!」

呢個時候,火鍋店電視播住大台嘅新聞,影住特首又一次呼籲僱主對僱員體諒。

「體諒有鬼用咩?不如用『明日大嶼』果一萬億搞好啲交通仲好啦!我要將軍澳有天橋過海呀!」做會計嘅阿強,從來唔會亂計數,佢覺得嗰一萬億應該要有利市民。

「講起『明日大嶼』就震撼啦。」向來返工唔使搭地鐵嘅我,喺食完第一輪肥牛後,終於有機會插嘴。「星期日嘅遊行,我見到唔少家長帶埋小朋友參與,多人到睇唔到龍尾。東角道行去政總要超過兩個鐘,好耐未試過。」

「大佬呀,一萬億喎!你同我都知香港嘅家長喺教育上嘅負擔幾重㗎!」愁緊小朋友讀邊間學校嘅阿堅:「搞返好香港嘅醫療同教育,香港人已經會好多謝政府啦。嗱,阿祥,你今日喺仁濟等得和味呢?」

「咪講呢啲啦,等睇醫生耐,睇完等藥仲耐!條人龍係等睇醫生嘅三倍,我睇見藥單係止痛藥,都費事等啦。有錢又唔投放喺醫療資源,香港都唔係人住嘅!」

「其實你哋有冇諗過移民?早排阿燈神股評人推薦移民檳城。」阿堅提議道。「檳城物價低,啲人又講廣東話,文化同香港幾相近。我都心郁郁架!」

「其實曼谷都唔錯㗎,啲樓又買得過,」阿祥見阿堅講到流口水,就加入分享。「曼谷醫療都唔差,係政治動盪啲啫,不過已經比新加坡自由啦。」

「其實我唔係無諗過移民。」我認真回答佢三個。「我都要為下一代諗㗎!2047之後我都老啦,但我哋嘅下一代呢?尤其是『明日大嶼』公佈之後,我個一刻真係覺得香港玩完。但最灰係我又諗唔到走得去邊。」

「做沉默大多數,出少句聲咪得囉!」阿堅答道。

「如果而家喺香港出少句聲,就唯有跟肥媽搬去大灣區食淡水魚生囉!連選舉都要DQ,入閘機會都無,仲講乜嘢民主。你以為叫劉德華嚟推銷,香港人就會倒錢落海支持『明日大嶼』?香港人有腦㗎!」

阿堅、阿強同阿祥點點頭。

「據我所知:有一班家長同教師聯合透過社交媒體號召一萬顆心堅決反對『明日大嶼』,等政府睇到我哋有反對嘅決心。」

「用意係好,但有冇用先?」阿祥質疑道。

「乜都唔做就一定無用!」我答道。「簡單嘅一個動作,就可以表達你對『明日大嶼』嘅不滿,合辦團體就會將收集嘅民意轉交政府同立法會。好過睇住香港死啊!」

******
我唔知我有冇影響到阿堅、阿強同阿祥嘅取態,但至少我開始咗第一步。你呢?

#萬顆心堅決反對明日大嶼

(文:孔令暉 @全民教育局 HKEd4All)(圖片來源:政府新聞處Youtube影片截圖)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2018年10月21日 下午6:00

發表評論

讀取中…
【DQ補選】范徐麗泰指一次DQ不等於永遠DQ 「結束一黨專政」囗號違憲