皇都戲院 x 中英外交|畢秋水網誌

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

中醫,中藥|生活旅客博客

2018-11-3 21:00
字體: A A A

執筆之時,啱啱喺睇開嘅中醫度等緊第三次覆診。

因為做家務,拉傷膊頭肌肉,原本冇諗住睇中醫,因為之前睇西醫畀嘅止痛藥重有成大包。但咁啱某日到醫院附近做嘢,所以就順便睇吓,點知就變咗常規覆診。

睇我嘅中醫好後生,睇樣都只係40出頭,原本見佢咁後生都有啲怯怯哋。點知佢把完脈,問症時除咗針對我膊頭痛,重居然問我有冇某種病症,係纏繞我多年嘅一個麻煩症候,我冇講,佢居然把脈就真係把到,以前睇嘅中醫都未試過有咁勁,當堂有啲佩服佢。

之後做針灸重神奇,我明明膊頭痛,佢就喺我手肘以下至手板位置落針,每落一針,就問我感覺點。落咗3針,就話okay咗。

到第二次覆診,佢就只落兩針,好似戲入面嘅針神咁,好勁。

第三次覆診,醫生就落咗4針。我問原因,佢話因為佢要出國,8日後至可以幫我覆診,所以要落4針等我撐耐啲。十足武俠小說中嘅「高人」「神醫」咁……

至於佢開畀我嘅中藥,係藥粉,沖水就飲得,我重試過撈落麥片度食。食咗,又真係幾有效,連糾纏多年嘅疾狀都減輕咗好多,好神奇。

講起中醫嘅神奇,曾經有套電影叫《刮痧》, 係講一個去美國湊孫嘅中國爺爺,見個孫唔舒服幫佢刮痧,畀唔理解中醫療法嘅美國社會視為虐待兒童而檢控嘅故事。

多年前有次出差去北京,去到酒店突然「沾寒沾凍」,頭暈身㷫,病到想死嗰種,但第二日重要開會,於是就拖住瘟瘟燉嘅身軀到酒店相連嘅商場之前幫襯過嘅按摩店,諗住按吓。點知個按摩師話我「情況嚴重」要刮痧至得。我未試過刮痧,掙扎好耐,但因為太辛苦,唯有試吓。

神奇嘅係刮完,按照師傅吩咐返酒店飲咗熱水,倒頭大睡,第二朝起身居然神清氣爽,重精神過未病之前,真係好神奇。

至於針灸,就係多年後做物理治療嘅時候我個治療師極力游說,至夠膽開始做。

一向唔信中醫嘅妹妹有久咳嘅毛病。有次同佢經過喺金鐘港大嘅中醫藥診所,就游說佢即管試吓。睇完,醫生開咗4劑藥,食咗兩劑已經見效。不過即使係咁,都未能夠令到對中醫半信半疑嘅妹妹更加願意睇中醫。

當然,無論中醫或者西醫,最好,都係全部唔使睇啦。

2018. 11. 1

岡山市立醫院嘅中醫科。

膊頭痛,中醫卻只針3針喺手肘以下位置,好神奇。

臺灣中醫開嘅藥都係藥粉沖劑,唔使煲,好方便。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2018年11月3日 下午9:00

發表評論

讀取中…
楊潤雄指很多政治問題被歸咎於通識科 將檢討現時模式能否讓學生「明辨是非」