再遊義大｜生活旅客博客

人生係一場單程旅行。但人生中嘅景點，就可以重覆遊覽。好似香港人，有人會一年去幾次日本，我有好多朋友都係咁。而我喺臺灣會經常重覆遊覽嘅地方，除咗自己住嘅岡山區嘅崗山之眼，就係離岡山約半個鐘頭車程嘅義大遊樂世界同義大皇家酒店。

會選擇義大嘅原因，係因為這邊真係完全休閒hea遊嘅上佳選擇。入到嚟，可以玩遊樂場，行 shopping mall、outlet、買包包、做 SPA、食中西日港臺式唔同口味嘅美食都完全唔使煩，唔使諗節目編排。總之，瞓醒就食，食飽就玩，玩夠又食，係好啱我這種超級懶精又貪食嘅人嘅旅遊度假形式。

岡山區真係好好食嘅食肆唔多，但義大嘅唔同口味餐廳，特別係間港式飲茶嘅皇樓就好有水準，所以一想飲茶就會諗到佢。

除咗食玩瞓，今次重遊義大重留意到一個好特別嘅現象：逢週末這邊就好多年輕父母帶佢哋嘅細路嚟度假，主要係酒店有家庭遊套餐，包食（早晚餐）住同遊樂場摩天輪票都係3,000至4,000新臺幣一位，非常之抵玩，而且喺新左營高鐵站每10分鐘就有接駁巴士入嚟，車程只半個鐘多啲，係好方便。一過咗週末，好似星期一朝早，雖然家庭客差唔多都走晒（啲細路要返學），但酒店仍然好多客，都換成young-old族。好多似乎係一班朋友「組團」嚟度假，三五成群，又係另一種情境。

其實喺臺灣生活一段時間，就會發現啲人成日話臺灣經濟差又未必盡然。起碼喺這邊，我冇見過咁多好似要喺香港執紙皮、朝早要喺地鐵站收集報紙嘅阿公阿婆。

有幾次喺酒店渡假，都見到好似喺義大見到嘅young-old一族，成班約埋嘅渡假團，就有啲似香港飲早茶時嘅一班長者街坊。咁當然，喺酒店渡假休閒嘅消費就比飲餐茶更高啦。所以直覺嚟講，臺灣老人家嘅平均生活質素，係比香港嘅老人家好。就算唔講飲茶度假vs執紙皮嘅對比，這邊嘅醫療福利都一定比香港更加user-friendly.

我去過這邊公立醫院睇症，好多老人家，醫院有志工（義工）幫佢哋排隊攞藥，提供輪椅服務等。輪侯時間又唔長，一般1個鐘頭之內由掛號到見醫生，攞藥一定全部搞掂，喺香港就算你有錢睇私家醫院都分分鐘唔只等咁短時間。而且醫護人員都好有耐性同好態度。事實上，喺臺灣有健保就可以睇公立私立醫院都得。但因為公立醫院科目更齊全，水準亦好，所以兩者其實唔係咁大分別。

這幾年香港政府為老人家提供醫療劵，總算好過冇。但係如果政府少做啲倒錢落海嘅大白象，而係投放更多資源做長者福利嘅話，香港老人家嘅生活應該唔至於差過臺灣 ~ 起碼，唔會有咁多喺臺灣就好少見到嘅執紙皮嘅公公婆婆吧。

2018. 11. 8

義大嘅摩天輪係地標，夜晚會有唔同嘅燈光幻彩，超過200幾種組合，好特別好靚。

日頭喺義大嘅遊樂購物廣場睇摩天輪，有另一番景象。

皇樓嘅港式飲茶好有水準，所以喺高雄一諗起飲茶，就會諗起皇樓。

義大嘅柳町日本餐廳做嘅套餐都好精緻。