紳士的黑啤|畢秋水網誌

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

塵埃落定|生活旅客博客

2018-12-1 21:00
字體: A A A

2017年3月26號香港特首選舉結束之後,港台《頭條新聞》播咗條配咗由張敬軒唱嘅 《塵埃落定》為背景嘅選舉剪輯片,令我認識咗這首旋律好好聽嘅歌(比較張嘅大熱歌《櫻花樹下》,我更喜歡這首)。

執筆之時,臺灣嘅九合一大投票日亦已經結束,塵埃落定:大部份綠地變咗藍天。

關於今次選舉,加10項議案嘅公投,網上已經有好多評論,選後分析。我嚟湊熱鬧,唔係講呢啲,而係想分享吓成個過程中嘅一啲見聞:

1. 選舉前有好多候選人嘅車隊遊行、宣傳、造勢大會呀咁,好熱鬧。

2. 選舉當日,媒體一早已經話好多人排隊,我住嘅地方附近間中學都係票站,的確排咗好多人。經過時曾經一時興起想影低,忽然諗起香港選舉都有規定唔准喺票站影相,就臨崖勒馬冇影到。返到屋企睇新聞,有個大陸男子嚟臺灣探親,話未見過選舉,喺票站影相,結果俾人拉咗刑檢。而喺票站影相嘅最高罰款係30萬臺幣,當堂一額汗。

3. 由於成個選舉好多票站都排晒長龍,有啲選民等到唔耐煩就索性走人。當時網上就瘋傳一篇帖文呼籲大家行使公民權,要等。當中引述臺灣藝人陳嘉行(焦糖)喺佢 FB 嘅一段說話:「我們的民主代價是排隊一小時,有些人坐牢幾十年還是夢想。不要覺得民主自由沒什麼,在有些國家、地方不曾存在這一小時。」的確好有感染力。但高雄就真係有個選民排排吓隊暈咗,送到醫院都救唔返,真係付上生命代價,係今次選舉嘅一件悲劇。

4. 其實今次投票真係好踴躍,好似高雄都有好多「北漂」嘅人專登返嚟佢哋嘅戶籍所在地投票。高鐵、臺鐵啲班次都滿晒座,重要加開特別車,連高速公路亦大排長龍。

5. 臺灣係唔准個人喺自己嘅電子平台(例如 FB)呼籲其他人投票畀邊個候選人,只能夠呼籲人投票。而我認識嘅臺灣人亦絕少同朋輩或其他人討論自己支持邊個,以免因為政見唔同而尷尬,喺這方面佢哋似乎更加成熟。

6. 睇網上反應,似乎香港人重緊張過臺灣人,尤其係結果出嚟之後。大部份藍營支持者會覺得關香港人鬼事,而綠營嘅支持者亦似乎覺得即使今次輸舖金亦唔係世界末日,因為4年後佢哋可以再選過。至於香港人覺得4年後畀國共聯手滲透,溫水煮蛙好難再發圍嘅憂慮,似乎佢哋又冇咁悲觀(或者話並冇咁大危機感)。

7. 選舉結束後各得勝同落選嘅參與者都展現應有風度,落選者亦呼籲民眾支持當選人,為建設更美好社會合作努力。只有臺北嘅落選人國民黨嘅丁守中不服以3000幾票落敗,話邊開票邊投票令某啲綠營選民 「棄姚保柯」令佢輸咗,提出覆檢訴訟。

8. 選舉結果喺投票日晚10點左右已大致定局。行政院長賴清德即時口頭請辭閣揆,跟住係蔡英文辭任民進黨黨主席,慰留賴清德,之後係陳菊請辭總統府助理,問責反應真係超快。當然,重點係點樣可以喺劣局中企返穩,重新出發。

塵埃落定之後,臺灣會唔會走回頭路、步香港後塵,或者點樣重新出發而力保民主、自由而唔受操控嘅制度,會係對這個華人民主國家嘅重大考驗,亦係好多香港人、華人,以至世界都關注嘅焦點。無論如何,但願天佑臺灣。

2018. 11. 29

今次臺灣嘅九合一選舉加公投反應非常踴躍,各地票站都大排長龍。而其中高雄嘅競爭選前亦被認為藍綠非常接近。高雄前市長陳菊就幫陳其邁站台。

臺北嘅票站亦大排長龍。高鐵臺鐵都要加開特別班次疏導返戶籍所在地投票嘅民眾。而有幾位喺臺灣服務超過50年嘅意大利修女,取得臺灣永久居民權,成為今次投票嘅 「首投族」。

臺中市長林佳龍、高雄綠營參選人陳其邁,臺北市長柯文哲分別到所屬票站投票。

總統蔡英文及前總統馬英九到票站排隊投票。

今次投票令藍綠版圖大翻轉。選舉後到晚上約10點,蔡英文已宣布辭任民進黨黨主席,為選舉失利負責。

臺北戰情一直緊湊。最後無黨派嘅現任市長柯文哲以3000幾票險勝。國文黨參選人丁守中不服,提出覆檢訴訟。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2018年12月1日 下午9:00

發表評論

讀取中…
綠色鄉村約章發起聯署促確認朱凱廸參選資格 譚耀宗稱選舉主任對參選人有要求屬合理