再說苗栗｜生活旅客博客

上星期講到去苗栗睇朋友嘅 dream house。 其實呢次去苗栗，除咗睇樓，都有遊覽吓，亦好值得介紹吓呢啲特別嘅景點。

到達苗栗嘅第一站，係朋友帶我去到一間開喺山上嘅意式餐廳，叫做58咖啡行館，係一間佈置得好清雅溫馨嘅餐廳，食品水平都好高吓，連我呢個唔多鐘意食西餐嘅人都覺得好好味。

間餐廳雖然坐落喺山上，而且價錢喺當地都算高，一份套餐要400幾至600新臺幣，但係聽朋友講，佢哋生意都好好。假日經常都滿座。我哋到嗰日因為係閒日，而且已經接近下就兩點，就比較清靜。但隔離都有一家大細一檯，都係專登揸車嚟幫襯。

食完豐盛嘅晏晝，朋友哋就帶我行餐廳旁嘅貓貍山公園。而苗栗著名嘅功維敘隧道原來就係喺呢度。

功維敘隧道全長460公尺，係喺日治時代明治36年 (1903年) 完工，至今已經有過百年嘅歷史。因為北口有嗰陣台灣總督──兒玉源太郎所提寫嘅「功維敘」，所以被稱為功維敘隧道。

1998年臺鐵山線鐵路雙軌化嘅工程完工後，火車改行駛新闢建嘅「苗南隧道」，功維敘隧道就停用咗。到2003年經過苗栗市公所整理，「功維敘隧道」就變身成為新嘅觀光景點。「功維敘」隧道建築保存良好，隧道內設有五彩繽紛嘅燈光，每日上就五點至下就八點開啟，閃亮隧道同時也照亮過往嘅歷史軌跡。而且隧道內重播放住音樂同火車行走時嘅聲音，置身其中，一路前行，真係有啲入咗時光隧道嘅感覺。

行完功維敘隧道，朋友嘅家姐重喺隧道口幫襯當地嘅攤販買咗包好大嘅蝶豆花。攤販話用嚟沖水飲可以補眼，抗氧化啊咁。我本來都心郁郁想買包，但問清楚個攤販，啲貨原來唔係臺灣本土種植，而居然係喺大陸入口，當堂就冇晒興趣買啦。

我哋遊覽完功維敘，睇咗朋友嘅 dream house，同樓盤嘅發展商林總吹咗輪水，至落番臺中食晚飯。

臺中嘅一人一鍋晚餐就係食 「輕井澤」。聽朋友講，又係間成日都爆滿嘅食肆。

就咁就渡過咗一個充實而愉快嘅苗栗之旅，真係要感謝朋友嘅邀請，更加期待佢哋嚟岡山時可以輪到我儘番吓 「地主之誼」吧。

2018. 12. 18

苗栗功維敘隧道

功維敘隧道同隧道前清幽嘅步道。

58咖啡行館。

行館內嘅佈置好溫馨，食品亦好好味。