19世紀的香港手信|畢秋水網誌

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

苗栗睇樓行|生活旅客博客

2018-12-15 21:00
字體: A A A

12月11號第一次到苗栗,原因唔係為咗 「旅遊」,而居然係為咗 「睇樓」。

因為有位香港嘅朋友同佢先生喺苗栗買咗間 「預售房」(即係香港嘅樓花)已經建得七七八八,大約出年3月就可以收樓,所以就叫我一齊去苗栗參觀吓。

臺灣嘅預售樓好得意 ~ 買家係可以隨時去樓盤度睇,據朋友講,佢同先生買咗個單位之後差唔每兩三個月就會去個樓盤度睇吓進度,可以話係睇住自己嘅屋企由零開始建起,好特別。

我哋到達樓盤嗰陣,迎面走嚟一位其貌不揚嘅阿伯,朋友好興奮咁嗌佢做 「林總」,原來呢位衣著樸素平實嘅阿伯就係個樓盤嘅老闆。林總就親自帶我哋參觀佢個樓盤,一邊滔滔不絕咁介紹樓盤嘅優點同工程進度。

林總嘅樓盤座落喺苗栗監理所(考車牌同攞車牌嘅地方)對開山上嘅山腰間,有3幢樓,每幢只有4層,每層一梯4伙。以香港嘅標準算係低密度住宅,而以岡山嘅叫法就應該算係「華廈」而唔係電梯大樓。每層嘅電梯大堂喺正中,4戶擺成田字型,就有啲似透天厝嘅佈局。

朋友買嘅單位係前排,面向監理所,露臺可以挑望山下景觀同苗栗小巨蛋,十分開揚。3房2廁,廁所都有窗,前後露臺,建坪大約40坪,實用率大約30坪,即大約900呎,價錢600萬新臺幣,即大約150萬港幣。平均大約15萬1坪,比臺中市平好多。但屋苑周圍就冇咩生活設施。不過如果長住喺呢處,揸車只要5分鐘就可以落到山下嘅鎮度買嘢同食嘢,亦唔算太過唔方便。

由苗栗去臺中機場,車程大約半個鐘,其實比起由臺中市去機場要大約45分鐘重快。但係如果要出臺中市就要揸成9個字車,坐臺鐵就要半個鐘,感覺就有啲「隔涉」。

我因為係坐臺鐵由岡山去苗栗,感覺苗栗真係好「偏遠」~ 因為火車過咗臺中同豐原站之後,就駛入條好長嘅隧道,而入隧道前嘅城市同晴朗天氣嘅風貌,出咗隧道後就忽然變成渺無人煙嘅山區同霧氣彌漫嘅景色,頓時令我有去咗「另外一個世界」嘅感覺,當時就心諗,朋友點解會咁大決心嚟呢種地方買樓。畢竟同香港嘅反差實在太大,比我住嘅岡山重大好多。

同朋友傾起佢哋嘅選擇,佢哋反而覺得冇咩嘢,話鐘意寧靜嘅鄉村式生活,鐘意苗栗比較「凍」(因為係山區,氣溫都比市區低),更加因為鐘意層樓開揚嘅景觀,諗住退休後就會搬到苗栗長住。事實上,佢哋係由臺中揸車到苗栗,先經過個樓盤嘅地盤,再去到售樓處睇模型,識咗林總,當下就決定買咗個單位,都可以算係一種緣份吧。

忽然諗起李超人曾經引用蘇軾嘅名句 「此心安處是吾鄉」~ 見到朋友真係咁有決心一吓由香港咁繁華嘅地方遷到比岡山更加 「鄉下」嘅苗栗,就真係明白呢句說話嘅意義了。

無論如何,祝福朋友搵到佢哋嘅 dream house。

2018. 12. 13

搭臺鐵入苗栗,火車過咗臺中同豐原站後入咗好長嘅隧道。一出隧道,原本晴朗嘅城市 view 忽然變咗霧氣瀰漫嘅山野 view, 好似去咗第二個世界。頓時感覺苗栗好 「隔涉」。

火車入咗苗栗鎮,至見番啲 「樓景」。

苗栗火車站前站。

由朋友間 dream house 露臺外望嘅苗栗市景色。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2018年12月15日 下午9:00

發表評論

讀取中…
法國電訊商料拒用華為5G設備 與傳統夥伴合作