陳文敏指鄭若驊引3年數字說法「取巧」 江樂士批鄭沒按檢控守則辦事

【5周年感言】Ches:問最簡單嘅問題,得出嘅答案往往超出你所想

2019-1-17 22:00
字體: A A A

喺852做得耐,或者聽得多游公子講嘢,有一句說話應該聽唔少:Common sense is not that common,初初聽可能只當係一句bite,耐咗就會發現,呢句話簡直係至理名言,而且畢生受用。

還記得入852之初,每當有達官貴人扑咪講嘢,一眾猛男同事總係能夠一邊寫稿,一邊搵到位怒插公仔箱入面嗰啲似是而非嘅偉論,當時我心諗,係咪真係有咁多嘢插呀大佬,阿膠官大人受納稅人幾百萬一年,唔係廢到你劑劑都搵到位插佢下話。

或是上天聽到我呢個無知少年嘅心底話,喺852嘅三年零八個月入面(係呀,真係三年零八個月呀),不論係高官定權貴,為求表忠自保卸責擦鞋刷存在感諸如此類,膠論廢話真係排到隊咁塞入你耳仔,聽到你唔想聽,而我亦好似當日嘅師兄s咁,一路打稿一路怒插膠論(小朋友聽到要掩耳仔)。

睇親電視都搵到位插,其一係852訓練有素,做得耐咗,對不同議題叫做有啲印象,自然會發現有關人等如何前言不對後語,或者好似《機動戰士Z高達》嘅阿寶咁講,人類總要重複同樣的錯誤,輕輕google一下,當日犯過嘅錯即刻呈現喺你眼前,只係唔知點解當事人「時運高」睇唔到,安然地重覆犯錯,又要出嚟為自己膠辯開脫。

其二,就係好似游公子話齋,Common sense is not that common,達官貴人出得嚟扑咪,原來係唔會保證講人話嘅!反之,係會用一個又一個似是而非嘅膠論,但求混淆視聽轉移視線燃燒airtime霸版位麻痺大家嘅意志……當然,不能排除當事人嘅智商同能力,係的確只能講出膠論,但其實咁樣都唔容易,正如一份零分嘅試卷,你估易考呀?

面對種種膠論膠人,有時真係只需要記住,Common sense is not that common,問最簡單嘅問題,得出嘅答案往往超出你所想,由何君堯嘅「殺無赦」、陳茂波睇書齋睇outline同頭尾,到愛字頭老友記連佔中三子都講唔出,Common sense呢樣嘢年中真係殺唔少人。

雖然已離開852,但仍會繼續Common sense is not that common嘅精神,用最簡單直接嘅方法,踢爆種種膠黨膠官膠人膠論。852踏入五周年,還有賴大家用Common sense,繼續關愛支持。

請支持我們持續發展,透過PayPal或其他方法贊助我們!
金額:
分類:|發表於2019年1月17日 下午10:00

發表評論

讀取中…
鄭若驊稱外判尋求法律意見非慣常做法 游清源:有少少疑惑都應請外聘律師解釋