中國人口2029年後開始減少──對香港的啟示|林超英網誌

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

佛光山佛陀紀念館|生活旅客博客

2019-1-12 21:00
字體: A A A

執筆之時,正準備明日又帶妹妹嘅舊同學到佛光山遊覽。

佛光山佛陀紀念館,係喺高雄除咗義大皇家酒店同阿公店水庫之外,我去得最多嘅景點。

因為佛陀紀念館好近義大,所以每次去義大,都必定會去吓。

第一次去佛陀紀念館,係兩年幾前以遊客身份,包車同媽媽妹妹一齊去。當時重因為我掛住影相,同入咗觀音殿嘅媽咪同妹妹 「失散」咗,搞到大熱天時喺紀念館內來回跑咗兩圈半至搵番佢哋,更因為呱件事成為屋企嘅笑柄,每次到佛光山,都會諗起當時嘅狼狽相。

第二次去佛陀紀念館,就係舊年端午節同媽媽妹妹重遊。因為嗰陣住喺義大,就搵日去遊覽。點知去到至發覺嗰日休館,本來諗住放棄。但係妹妹就堅持第二日再去過。講起上嚟好特別,端午節期間高雄都連續落雨,我哋第二日再去佛光山時就居然停咗雨,重出太陽,天氣又冇平時咁熱。多得妹妹嘅堅持,亦係我同佢最大嘅性格差異 ~ 妹妹做嘢好貫徹始終,好有毅力同恆心,亦成就佢成為擁有雙學位、3個 Master Degree 嘅學霸同專業人士。而我就係出咗名嘅「半途而廢」派掌門人,因為只要對住本書,基本上都可以喺5分鐘內自動瞌埋對眼,瞓著重快過食安眠藥。

第三次去佛光山,係媽媽11月家訪延長逗留,返義大住嘅時候去嘅。嗰次重咁啱有素食品展覽,重有兩匹馬喺現場俾遊客一齊影相,好特別。

啱啱再去佛光山,就係2018年冬至前張生張太嚟探訪,喺張太生日嗰日以 「哎吔導遊」嘅身份帶佢哋去參觀。每次去佛光山,都必定會喺佛陀紀念館入面嘅漢來素食館食晏。素食館係由漢來酒店經營,料理好精緻美味,張生張太食到都讚不絕口,話有200分,亦令我身為導遊嘅覺得好有成就感。

張生鐘意影相,佛光山就提供咗好好嘅場景。當日天氣亦超好,金色莊嚴嘅佛陀坐像映照著湛藍色嘅晴空,非常有氣勢,充滿住美滿開朗又愉悅嘅氛圍。

佛陀紀念館令人佩服嘅地方,係由星雲大師發起,以一位出家人嘅意志,籌集眾多善信嘅支持,經過10幾年嘅努力,從零開始建設出一座恢宏壯觀嘅建築群,當中所需要嘅努力同堅持,絕對令我呢種以 「半途而廢」為強項嘅人目瞪口呆,敬佩到五體投地。

講起佛陀紀念館,重有另一個小插曲,土生土長嘅高雄朋友蘇生蘇太想帶佢哋喺美國返臺灣旅遊嘅表親遊覽,卻居然去錯咗舊嘅佛光山廟,係喺山上,要上山,而唔係去到新建嘅佛陀紀念館。土生土長嘅本地人卻居然去錯地方,都真係有啲匪夷所思。就好似好多土生土長嘅香港人未去過西貢嘅東霸、東坪洲、鹽田梓啊咁。

其實,香港人好多時的確只諗住外遊,日本啊、韓國啊、美加澳紐、歐洲啊咁,卻忽略咗自己家鄉值得遊歷嘅美麗景點。

2019. 1. 9

佛陀紀念館嘅巨大佛陀座像喺湛藍嘅晴空影照中顯得既莊嚴,又祥和。

佛陀紀念館正門。

佛陀紀念館大道兩旁有8座塔,每邊4座,代表8正道。

佛陀座像平臺上亦有4座塔:文殊,普賢,觀音,地藏。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年1月12日 下午9:00

發表評論

讀取中…
陸漁船越界 台海巡隊登船查獲10公斤豬肉