銅鑼灣的後花園|畢秋水網誌

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

素食|生活旅客博客

2019-1-19 21:00
字體: A A A

人生離唔開衣食住行。而對我嚟講,食,係好重要。

最近網上有篇報導,一位港女喺臺灣遊覽5日,瘋狂 「掃街」食地道小食,短短幾日就肥咗近10磅。

講到食,臺灣嘅美食的確唔少,除咗地道嘅閩南小食,好似麵啊,滷味啊咁,近年更多咗好多港式嘅食肆; 就以岡山嚟講,要飲茶都有兩間幾有 「規模」嘅餐廳:蒸點心同蒸鮮味。上個月我住嘅地方更開咗間小型港式食店,有賣蒸飯,廣東粥,例湯,包餃同排骨鳳爪啊咁,但因為間店好細,只有兩姊弟經營,選擇就比較少。

而我特別想提吓臺灣嘅素食。喺香港,總係感覺好好食嘅素食館唔多,比較有信心嘅係南蓮池苑入面嘅素食館。但係喺臺灣,即使只係賣臺式自助餐嘅大眾食店,我都會覺得素食煮得比葷菜好食,所以嚟到臺灣,係食多咗好多素食。

喺高雄,我特別心儀嘅素食係佛光山佛陀紀念館入面嘅漢來素食館。每次帶朋友遊覽佛光山,都一定喺喱度食餐飯,因為啲食物真係做得好好味,賣相亦精緻,但價錢亦唔係太貴,套用臺灣人嘅講法,CP值係好高。

喺臺中,每次去到,尤其係喺星期四,就一定會去聖華宮食素食自助餐。因為嗰度係逢星期四有特價,大概100蚊港幣就可以食有超過百幾種選擇嘅素食自助餐,由頭盤到主食,粥粉麵飯,甜品,水果,飲料應有盡有,而且非常好味。好多出家人亦都會嚟食,所以一定要訂位至有得食。

近年成日喺網上睇到動物被屠宰嘅貼文,就盡量少食葷菜。雖然仲未能夠做到全素,但可以嘅話都唔食咁多肉,自己亦稍為覺得心安理得。有時好想食肉,就會改食海鮮,咁做當然係非常「偽善」,因為海鮮都一樣係生命。

總之,美食雖然重要,但諗起動物被宰殺嘅可怕場景,就可以盡量節制不必要嘅口腹之慾了。新嘅一年,願大家都保有更多慈悲之心,而唔係好似一件數字人咁,跳出嚟話要撲殺野豬咁折墮啦。

2019.1.17

臺中聖華宮嘅自助餐素食,超過100款,要乜有乜。

聖華宮嘅素食自助餐中有點食嘅小炒。

聖華宮素食自助餐中嘅精品 (個人意見)。

高雄佛陀紀念館漢來素食嘅精美點心。

素來素食館嘅八寶飯。

漢來嘅十方湯同豆腐花,好值得一試。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年1月19日 下午9:00

發表評論

讀取中…
不開心是一項毋須愧咎的權利|全民教育局HKEd4All