回鄉過年｜生活旅客博客

2019年嘅豬年農曆新年，我終於可以「回鄉」~ 返香港過年啦。

懷住極興奮嘅心情，1月28號出到高雄機場，行李喼同背囊裝滿嘅唔係衣物，而係滿滿嘅80個太陽餅。我買嗰隻太陽餅，唔係機場賣嗰啲牌子，而係一間老字號，要專登去間舖頭，或者喺專賣櫃位至買得到。除咗自己朋友，重有媽媽嘅朋友，都要帶啲手信。其實返到香港，至發覺啲餅都唔多夠分。不過我為咗避開喺香港機場等托運行李（因為真係要等好耐），所以只係帶咗隻手拖喼裝餅，加埋個背囊，裝到80個餅已經係極限了。

喺高雄小港機場捷運站行去出境大廳嘅長廊掛咗好多幅雀仔嘅照片，以前行過都冇乜感覺，但今次一路望吓啲雀仔相一路行， 忽然有種覺得自己係回鄉侯鳥嘅感覺。

飛機差唔多到香港機場上空，忍唔住望吓這塊成長嘅土地，雖然有些少霧，但係喺海面上散落嘅島嶼依然美麗。

返到香港，多得位認識多年嘅朋友接機，好有home again嘅感動。

之後幾日都不斷同朋友聚會，有時一日走3、4場。畢竟成年冇見，大家聚埋就有好多話題。

執筆之日，已經係大年初一，原來唔經唔覺已返咗香港超過一星期，但時間似飛快。

在家千日好，真係一啲都冇錯。

2019. 2. 5

農曆新年將近，不過高雄機場嘅佈置仍然重有聖誕氣氛。

Take me home the flight.

戊戌年除夕，屋企窗外嘅晨曦影色非常美麗。如果我有120歲命，60年後可望再見。