希望｜生活旅客博客

都講年輕人係社會未來嘅希望。今年2月18號嘅一場高主教小學部嘅運動會，就令我深有感受。

朋友張先生係高主教嘅舊生，而且負責製作部同剪片部門嘅港台前高層，退休後仍然好積極做義工，特別係同拍攝有關嘅工作。任何非牟利團體搵佢幫手，只要係能力所及都永冇托手踭，非常熱心。

之前朋友都有幫手喺幾個非牟利活動中擔任義務攝影，由拍攝到剪片一手包辦。港台前高層嘅功力當然唔係講笑，拍出嚟嘅片都好有專業水準。

2月18號係朋友母校高主教書院小學部嘅運動會，朋友係當然嘅義工，亦邀請我幫手拍攝啲花絮，當係畀我練習吓現場拍攝嘅技巧。有咁好嘅機會，自然非常樂於參與啦。

拍攝當日，一如以往，朋友好早（7點）已經到灣仔運動場準備，比起好多做正職返工嘅人都認真。我因為住得遠，又要先食個早餐，就應承8點前到。

到咗現場，朋友指示我需要拍攝嘅位置、走位、有咩需要拍低、拍攝嘅基本技巧等。嗰日朝早一直落毛毛雨，到拍攝中途雨越嚟越大。我喺召集區拍攝學生仔預備出賽同完成賽事後返後臺嘅花絮，同觀眾席上嘅情況。係有瓦遮頭，但拍攝到兩個幾鐘，已經覺得好攰。望返喺運動場上拍攝緊嘅朋友，冒著雨重要通場走位拍唔同嘅賽事，卻仍然精力充沛咁，真係不得不佩服佢嘅專業同熱誠。

喺觀眾席，見到同學仔哋有講有笑，既投入又興奮；參賽嘅小選手亦無懼風雨咁積極準備，同佢哋N年前畢業嘅前輩嗰種熱誠真係不遑多讓，忽然有種薪火相傳、將香港人拼搏精神傳承嘅感覺。

天氣雖然灰暗落雨，但係喺我這位熱心公益嘅朋友身上，同這班年輕人稚氣而可愛嘅臉上，我仍然睇到對未來嘅希望。

2019. 3. 6

運動會當日天色陰暗，之後重落起幾大雨。

雖然天氣唔好，但無損參賽學生同陪伴嘅家長們投入嘅熱情。