【移交逃犯修例】梁君彥對委員會會議現「嚴重秩序問題」深感痛心 籲理性和平參與審議

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

時光倒流|生活旅客博客

2019-5-11 21:00
字體: A A A

銅鑼灣係我經常出沒嘅地方。當年崇光冇咁多人行,我差唔多每日放工都要去行返轉至返屋企。所以一向都自問係銅鑼灣嘅「地膽」。

前兩日同位朋友約喺銅鑼灣聚會,估唔到居然去到個自己咁多年都唔知道嘅「秘景」,經歷重恍如「時光倒流」。

「秘景」所在之處係銅鑼灣嘅希雲街,英文名 Heaven Street,睇個名就已經有啲 「詭異」。條街其實喺禮頓道近保良局附近,係條幾闊吓嘅橫街,有幾間食肆同間順豐嘅集散站。

同朋友喺希雲街一間小店食晏,一個豬扒餐,豬扒大大件跟飯,連飲品都只係46蚊,喺今時今日嘅香港,都可以算得上係抵到核爆。但最令我驚喜嘅,係食咗飯之後信步行出街,居然留意到一幢禮信大廈,係明顯50年代建築。同朋友行入大廈樓下嘅公用位置,頓時有如時光倒流嘅感覺。

大廈公用位置有啲似而家住宅樓下嘅商場,但經營嘅都係小店,亦有食肆檔口,我哋重巧遇位住客帶住隻狗仔喺度玩。狗狗好明顯熟晒地頭,喺「商場」跑嚟跑去,玩得好開心。而由 「商場」望入去住宅入口,居然見到入面重係用緊拉閘嘅電梯,好特別。相信當年新落成時,呢種有電梯,樓下又有商場舖位嘅大廈,應該都算係「摩登豪宅」吧。

行出禮信大廈,即刻一吓飛返21世紀熙來攘往嘅銅鑼灣。真係好奇妙嘅經歷。如果大家未去過都不妨去行吓,影吓相,亦不失係假日一個好節目。

香港,其實重有好多值得探索嘅地方。

2019. 5. 9

由熙來攘往嘅銅鑼灣一吓行入禮信大廈,即時有時光倒流70年嘅感覺。

禮信大廈地下管理處非常舊式,重有食肆。

大廈地下亦有舖頭,其中一間門口重泊咗好多古董電單車。

有隻應該係住喺大廈嘅狗仔由主人帶住喺地下「商場」跑嚟跑去,熟哂地頭,好開心。佢重跑得好快,快到連定鏡都影唔到。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年5月11日 下午9:00

發表評論

讀取中…
【移交逃犯修例】劉兆佳:香港要堵塞漏洞 免續成威脅國安逃犯避難所