味道｜生活旅客博客

曾經聽人講過：「味道」可以係一種回憶。的而且確，自己都經歷過 「味道」嘅回憶。

味道有兩種：聞嘅同食嘅。

我回憶中可以聞到嘅味道，係糖廠煮糖時散發出嚟嘅香甜糖蜜味，同一樣都係喺糖廠釋放出嚟嘅臭到好似屎一樣嘅濾泥味。 同樣都係糖廠，有兩種極端嘅味道，好似人生一樣，有時真係一擔沙糖一擔屎。

至於食嘅味道，當然唔應該有屎味啦。而我回憶中最有感覺嘅食味，係越興園嘅越南菜嘅味道。

相信稍有「資歷」嘅朋友，都食過或者知道銅鑼灣總統商場對面嘅越興園。80年代初，爸爸喺總統商場附近開舖頭，每晚收舖都幾乎必定會幫襯越興園。當年嘅越興園，係好家庭式。記憶中掌櫃嘅係老闆嘅千金，一位20零歲嘅亮麗女仔，好醒目同快手。佢哋落單靠吊喺食店上嘅 「軌道」~ 將啲單放喺軌道上掛住嘅桶仔轆嚟轆去，好好玩的。

爸爸當年最鍾意食「鴨仔蛋」，一隻半孵化成型嘅鴨蛋 – 當年並冇咩動物保護意識，但直覺覺得好核突，所以從來都唔敢食，甚至唔多敢睇。而我自己最鍾意食嘅，就係可以加好多薄荷葉用生菜包著嘅熱辣辣炸春卷，同牛油雞翼。

最近無意中喺新居附近發現咗間家庭式越南小食店，由一位嫁到岡山19年嘅華裔越南女士經營。佢賣嘅品種唔多，冇牛油雞翼。不過河粉、涼麵、春卷同炸春卷都頗有當年越興園嘅一啲味道。而佢重有種加咗臺式滷肉，好有臺式風味嘅 「法式麵包」就好有特色，更特別適合天氣熱嘅高雄。

小店個名叫燕欣 ~ 係老闆娘小女兒嘅名。佢話鍾意女多過仔。有次去食嘢見到佢位千金，兩歲幾三歲，同媽咪好似餅印；而位6歲幾嘅囝囝就似足嗲哋。我雖然從來都幾怕細蚊仔，對小朋友冇太大興趣，但係見到這種基因承傳，都不自覺感到世代繁衍嘅偉大。

由一種味道，可以引發出好多舊回憶，新感受。人生的確係個奇妙嘅旅程。

2019.4.11

新居附近嘅越南小店嘅越南粉麵好住家式，重帶點當年銅鑼灣總統商場對面越興園嘅感覺。

小店老闆娘做嘅有臺灣特色嘅法式麵包，同啤酒一齊配搭，係種幾 「寫意」嘅選擇。

食完越南餐，食返個芭樂。臺灣嘅芭樂今年超產大跌價。其實芭樂好有益，加啲話梅粉，重好食。