近在咫尺｜生活旅客博客

香港有個舉世聞名嘅世界級地質公園，位於香港新界東部同東北部，包括新界東北沉積岩同西貢東部火山岩兩大園區等合共8大景區，佔地5,000公頃。2015年11月更名為香港聯合國教科文組織世界地質公園。

地質公園重有首主題曲 《近在咫尺》~ 因為香港地質公園嘅特色，係由石屎森林入到地質公園，只係咫尺之距，唔會好似喺外國咁，要揸幾個鐘頭車至到。係好特別嘅「賣點」。首歌好好聽，重輯錄咗好多靚景，大家有時間不妨上 YouTube 睇吓：https://youtu.be/6UpkPQgaLFU

成個地質公園咁大，我去得最多嘅就係萬宜水庫嘅東壩。以前住喺西貢，假日一有時間就會入去行。而凡係有國內或外國朋友嚟玩，只要時間許可，我都必定導遊佢哋到東壩行吓，打吓卡。每次啲朋友都會驚嘆香港居然會有咁「郊野」嘅世外之地，同佢哋認知中嘅石屎森林大相逕庭而目瞪口呆。

更加特別嘅係這區有好多牛牛，試過有由高雄嚟嘅，以至英國嚟嘅朋友去到，都話即使喺佢哋自己「鄉下」都未見過咁多牛。

以前要入東壩，除咗有禁區紙嘅私家車，就要坐綠的。最近多咗條9號A綠色小巴入去，但聽講只限喺假日行走，而且班次好疏。其實咁亦好啱，可以防止這區被太多車輛污染，亦可以保護牛牛有個比較安全嘅棲息之地。其實要入東壩，由北潭涌禁區起點開始，步程快嘅大約3個鐘就行到，沿途風光秀麗非常，所以行吓都無妨，重好過坐車走馬看花啦。

上星期同兩位英國朋友同佢哋嘅未滿兩歲小朋友入東壩，沿途有好多牛牛。小朋友異常興奮，因為喺英國佢都冇見過咁多牛。一路行一路大叫「cow cow cow」，行過咗唔見啲牛就大嗌「oh no, no cow, no cow」，嗌嗌吓忽然又大叫「Macau, Macau」，笑到我哋標哂眼淚。就同佢講：「No, it’s cow, not Macau，係 cow，唔係乜 cow……」

一個愉快嘅東壩之旅，就喺同小朋友嘅歡聲笑語中度過。

2019. 5. 31

上星期雨後去到東壩，好有出塵脫俗之感。

晴朗天氣下嘅東壩就非常亮麗。

東壩一帶有好多牛牛，祝福佢哋有舒適安全嘅棲息之地。

上：創興水上活動中心喺70年代曾經係越南難民嘅禁閉營。
下：東壩嘅長長防波堤。