kit [email protected]社漫網誌│社漫網誌│午睡

陳玨明網誌│愛恨香港100個理由26──表個態啫,使要使死呀?

2014-6-22 12:01
字體: A A A

一連兩三日,fb被全民投票日的貼圖洗版,身邊朋友見面問的,係「投咗票未?」就連自己教會,都鼓勵大家參與最大型的民意收集活動,家下有什麼收集民意比起全民投票更大?所以,只係一日半的時間,大會報告的參與人數,已經過了50萬,嘩,香港有希望啦!

冷靜啲!佔中搞的呢個全民投票,事先被人批評三個方案都只得公民提名元素,有人又話驚投票結果被佔中運動騎劫,有所謂泛民更早已揚言杯葛不會參與,所以之前吹起一片冷風,甚至有傳驚連十萬都過唔到,佔中三子要公開謝罪。

北京成日怪香港人唔識感恩,今次就真係要大大力多謝,先忽然出隻「白皮豬」來威嚇香港人,提大家記住「邊個先係老闆」,然後又搵個中方紅人「唔亮聲」亂咁來主持財委會,令民怨積聚,再然後,特區政府、中聯辦同港澳辦都開腔一齊批評全民投票係「犯法」,恐怕大家不用思考,都知北京愈打壓,件事一定係愈啱愈要去做,所以好可能投票的人中,有一半係被北京「逼」出來。

因為六四如是、爭取民主如是、查豆腐渣工程如是,仲有三聚青胺奶粉等,既然話我們犯法,就好似嗌平反六四係顛覆國家,要查四川地震豆腐渣工程係尋釁滋事一樣,你一係拉我,唔係就唔好嘈住晒,反正票我們是「投硬的」。

政府口口聲聲話全民投票不合法,咁你唔去檢控大台全民投票選港姐同選視帝視后?原來呢啲當選者係不合法當選的?而大台舉行不合法的全民投票,你唔去搵通訊辦吊銷佢個牌照?講呢啲!

其實,參與全民投票,大家都知改變不了什麼,最少一時三刻唔使發夢;不過,這一個表態卻是非常重要,所以大家唔介意佢有冇法律效力,亦唔在乎是否之後有即時效果,總之就一定要表態。

事實上,更加唔好成日用公投不合法來「撻」香港人,講公投,睇睇人家投什麼議題:

瑞典由1922年至今,舉行過6次全國公投,議題分別為:禁酒、改變駕駛方向、以政府稅收資助退休金、核能發電、加入歐洲聯盟、採用歐元,但瑞典公投為諮詢性質,不具約束力,議會也未必按完全按照投票結果制訂政策。

1995年10月30日,加拿大魁北克公民第二次就魁北克應否脫離加拿大成為獨立國家而舉行公投,結果49.42%選民支持、50.58%選民反對,反方險勝。加拿大繼續「統一」,北京敢唔敢畀香港人咁投一次呀?講公投?!

仲有的例子,包括蘇格蘭同克里米亞,人家公投是表決很認真的東西的,而我們現在,其實同選港姐冇咩分別啦,即係投了票,最後唔會令到大台倒閉,同理,爭取公民提名,點會係變成想奪權呀?

不過,既然你北京咁認真要玩到咁大,出動埋國家級黑色攻擊,咁香港人好識配合的,咪同你也認真地去投一次票囉!而成件事由一開始,當權者一定驚過香港市民,特別是那些真的愛香港的公民。

在此開盤(有信仰就無謂打賭了),佔中投票,最終有百萬人參加,而今次七一,無可能少過五十萬人。如果去唔到以上目標,即管上《852郵報》搵我,會整定超好食的「獨眼魚旦」同肉骨茶親自賠罪!

請支持我們持續發展,透過PayPal或其他方法贊助我們!
金額:
分類:|發表於2014年6月22日 下午12:01

發表評論

讀取中…
陳建平網誌│我的這個拍檔