【讀家新聞】目無港人北京娥,引爆驚世黑天鵝!

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

旅行 ~ 晴空|生活旅客博客

2019-6-22 21:00
字體: A A A

上個星期反覆覆落咗成個星期嘅雨,到今個禮拜終於叫做放晴啦。每一日都係藍天白雲,好靚。

就好似香港喺過去嘅一個星期發生嘅風風雨雨,唔知有冇放晴到?

無論點都好,起碼而家大家可以抖返啖氣,因為人生嘅路係好長,可以預見,仲有好耐好耐嘅日子我哋要經歷好多嘅考驗,先至行得過去。

喺過去嘅一個星期,我能夠體會到嘅就係,身唔喺香港有好有唔好:唔好嘅,當然係冇辦法參與一個令到舉世都感動嘅全民運動,但係好嘅地方,卻係可以比較平心靜氣、 比較客觀咁去睇成件事,去思考一下前因後果、去諗一吓以後香港條路其實係可以點行呢?

我諗呢個係好多人都會諗嘅問題,亦有好多人都已經講咗好多嘅理論。我亦都冇資格去講。

不過自己嘅感受就係,無論喺任何時間,保持理智的確係一個好重要嘅品質,而呢一種品質無論喺任何嘅事件入面,甚至喺我哋自己嘅人生旅途入面都係可以幫助我哋度過好多嘅難關,度過好多嘅起跌同困惑。

而另外一個好重要嘅品質,就係可以保持初心。

喺大陸有一句說話,叫做「屁股指揮腦袋」。喺今次嘅事件入面嘅好多人,出現嘅眾生相, 畀我哋睇到嘅「騎呢」怪象等等,令我懷疑當日佢哋嘅初心又係點嘅呢?佢哋有冇初心嘅呢?

或者都有,但係可能因為「屁股指揮腦袋」,利令智昏而已經改變咗。

保持初心唔係容易,保持初心又需要理智。好多唔理智嘅人,就係因為一時衝動,做咗一啲事,之後就要妥協……

一場令全世界觸目而感動嘅全民運動,除咗事件本身,其實重有好多令我哋可以做個人反思嘅題材。

喺事件中,網上有幅200萬+1嘅遊行場面圖片,標題係:「 香港人唔係要創造歷史,而係要創造命運」。

我諗如果我哋真係可以喺呢一件事件入面,搵到一啲可以令我哋自我成長嘅亮點,喺某個程度上,其實已經可以做到呢一句說話嘅含義了。

但願香港嘅年輕人,喺「抗爭」嘅同時,一定要保持清朗理性嘅頭腦,熾熱明亮嘅初心,就好似今日嘅晴空一樣,守護香港、守護香港嘅未來。願天佑我城。

*** 補充講多句,但個人覺得非常重要。上屆區議會選舉,18至30歲年齡層選民登記唔夠19萬人,係各年齡層最少,令人咋舌。好多人認為區議會選舉唔重要係錯。區議員係可以攞到好多政府資源,為佢哋增加對市民提供服務本錢,令佢哋可以藉此把持喺政治上嘅影響力。

所以如果年輕人唔希望睇到香港被某啲集團騎劫,就要由最基本開始,登記做選民,用選票為自己發聲。加油。

2019. 6. 20

 

落咗成個星期雨之後,岡山出現嘅藍天白雲嘅晴空。

但願香港嘅年輕人,喺「抗爭」嘅同時,可以保持清朗理性嘅頭腦,熾熱明亮嘅初心,就好似今日嘅晴空一樣,守護香港、守護香港嘅未來。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年6月22日 下午9:00

發表評論

讀取中…
【金鐘衝突】陳方安生向林鄭發公開信 促明確撤回修例並考慮釋放被捕人士