光復上水:示威者晚上陸續散去 警方約8時開始清場(有片)

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

服兵役|生活旅客博客

2019-7-13 21:00
字體: A A A

上星期出城,喺臺鐵上面睇到徵兵嘅廣告。好多人移民臺灣,都會先諗吓需唔需要服兵役。亦有好多人為咗避免服兵役,就會揀喺32歲之後,即係應該服兵役嘅年齡之後先至會移民台灣。

其實而家台灣嘅服兵役制度,已經由徵兵制變成募兵制。

而家嘅後生仔,服兵役亦由當年最初好似話要服兩年,減到一年,到而家就只係大概需要服四至到八個星期嘅兵役,一般都係喺暑假。其實就好似係一個暑期嘅夏令營咁。好多台灣人講,喺服兵役嘅軍校入面教嗰啲新兵嘅軍官,其實係好可憐:因為佢哋人工唔係特別高,但係就要照顧一班所謂嘅金菠蘿。係非常之辛苦,壓力非常之大。而家喺台灣服兵役嘅後生仔只係服大概四至八個星期嘅暑期兵役,有啲如果身體唔好,或者係有啲特別嘅技能,重可以服一啲所謂嘅代替役,即係去一啲公司或者係一啲科技嘅部門去做一啲服務而已。

我諗番起自己當年大學畢業,曾經做咗一啲「貼錢買難受」嘅嘢。自己畀咗幾千蚊去參加一個三日兩夜嘅outward bound訓練營。

喺嗰三日兩夜嘅過程入面,自己嘅得著係好多。特別我記得嘅係喺夜晚我哋要行山路,而係冇配備電筒。導師就話畀我哋聽,其實夜晚如果有月光嘅時候喺山上面嗰啲石頭係會有啲反光,所以其實係睇到路嘅。而唔用電筒亦都可以避免某啲危險。我哋亦試過就咁喺一個所謂嘅營帳入面過一晚。個營帳只係用四支棍插喺地下面一張蓆度,上面再放多一張帆布而已。我哋就要喺個帳度過成晚。可能因為太攰,即使咁嘅環境,我啲隊友話我知我都瞓到扯晒鼻鼾。喺嗰個訓練入面,其實令到自己發覺有好多我哋覺得自己睇嚟做唔到嘅嘢,但係當真係去到要生存嘅時候,其實都係可以做得到㗎。雖然只係三日兩夜,但係原來話畀自己聽,好多嘢係可以由冇可能變成有可能。只要你有決心同埋有適當嘅方法。

我亦都記得曾經識得一位新加坡嘅同事,因為佢個仔需要服兵役,令佢非常之擔心。由佢個仔去服兵役之前嘅一年佢已經開始擔心,擔心足一年。點知再過多一年之後問返佢,佢嘅態度居然大為改變。佢話好感謝嗰一年嘅兵役令到佢個仔完全脫胎換骨,由一個完全冇紀律、瞓到唔知醒、踢都唔起身嘅廢青,變成一個非常有紀律、非常整齊、非常之有自律嘅一個年輕人。佢睇返轉頭,覺得自己當年咁擔心嘅服兵役其實係多餘。佢重話如果有得再揀,佢寧願畀個仔早啲服兵役添。

講返台灣嘅服兵役,而家係用募兵制。如果啲後生仔係想以軍人作為自己嘅職業,係可以去申請當兵。當兵亦有唔同嘅條件。如果係大學畢業,一般就可以用一個軍官嘅階級考入去。

其實當兵都可以係一個好好嘅職業,因為既可以保家衛國,亦都可以有一個好穩定嘅收入,而且受人尊重。

而喺香港係唔需要當兵,最多只係「當差」。近幾個月,好多人又會重新開始講返「好仔唔當差」。點解我哋嘅社會變成咁?一份原應該令到人可以引以為傲嘅職業,亦都係可以保衛自己嘅社會,保護市民嘅職業,點解會變成令到人哋覺得咁討厭嘅職業呢?

呢個真係應該我哋政府好好反思嘅問題。

 

臺鐵上嘅募兵廣告吸引咗我,係因為「同行」嘅字眼。

海軍嘅募兵廣告,似乎好有型。而且收入都好好。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年7月13日 下午9:00

發表評論

讀取中…
【光復上水】示威者遊行後與警方爆衝突 警多次施放胡椒噴霧(有片)