澳洲的大學|姚啟榮網誌

特約轉載

不時跟讀者分享各路名家文章,集思廣益。

林榮基:為劉康寫代序|特約轉載

2019-7-29 22:45
字體: A A A

(編按:就讀中學期間,曾於與特首林鄭月娥合照時展示「港獨」標語的劉康,上月成立香港效益主義黨。由於特區政府修訂《逃犯條例》而離港赴台的銅鑼灣書店前店長林榮基,最近為劉康的作品寫代序。)

劉康讓我寫代序。

初見劉康,印象不太好,喺朋友屋企等咗又等,最後電話嗡,唔上嚟,改去街口見,覺得唔濌伯,全無時間觀念。嗰陣五月初,前後腳,我嚟台北佢就到。其時「送中條例」,林奠話之你死,有恃無恐,挌硬嚟,三月反「送中」,只得萬三人,反抗微弱,令人失望。其後再遊行,不過倒轉,變成三萬幾。眼看前景不妙,我惟有着草先。

以為劉康亦擔心,因為口袋罪,舉過「香港獨立」,仲喺林奠頭頂,如果惡法通過,走唔甩。除此以外,我唔知佢點解嚟,斷估唔係有閒情,出嚟玩啩?

路邊攤一坐低,朋友問去咗邊:逛夜市,所以遲到。真喺吹賬!!!我有些心急,問佢點打算,喺咪想留喺台灣?原來唔喺,的確嚟玩,睇住菜單。同朋友眼望望。其後我又問,返香港,唔擔心?無乜反應,點完菜,就講其它。

大概怕殊途同歸,見「香港民族黨」被禁,佢話政黨要改名。我問改乜嘢,唔講。後來見網絡消息,變成「香港效益主義」。睇過報導,知道啲,源自英國哲學家邊泌。所謂「效益」或「功利」,如同楊朱「拔一毛以利天下而不為」,尋求個人幸福,亦為天下人。

無想過會搵我,寫兩句。平時都留意佢,唔知點樣,我擔心喺香港,遲早出事;更加冇想到,年紀輕輕,會出書。

實話實說,我這種買書佬,腌腥悶,唔喺好書唔推薦。劉康呢本嘢,寫得好咩?好難講,因為睇書講年紀,唔同年歲唔同感受。一如漫畫,細路覺得好好笑,大人無感覺,就喺呢個道理。劉康嘅年紀,正是慘綠少年,唔大唔細,有時好幼稚,但呢個唔使理,重要喺佢為人,有乜價值觀。

佢啲文章網絡上,多數睇過晒,算唔錯──我指跟同齡人比,成熟好多。特別喺社會議題,試問香港有幾個學生哥,痞過壁屋、受過折磨。其中一篇,越睇越難過,尤其個罪名,絕對荒謬,有乜理由,玩具當真槍?從佢嘅遭遇,可見香港法庭,經已不公。

大抵經歷,加上睇書,唔同鍵盤戰士,紙上談兵。佢係身體力行,用書本知識,應對現實,唔逃避、唔埋怨,勇敢直視,呢啲價值觀,就係優點。我諗年輕人上街、遊行,對抗強權,面對橡膠子彈,仍然冇放棄,就係呢種精神。

林榮基 台北 2019/7/29

(圖片來源:蘋果日報)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2019年7月29日 下午10:45

發表評論

讀取中…
西環唔認落柯打,要何滾友孭晒佢!