即時關注│台國安疑濫權酒店「爆房」 為保王張會「軟禁」示威者

Angelina網誌│Angelina短打│中港矛盾燒到空姐頭上

2014-6-25 15:42
字體: A A A

估都估唔到,中港矛盾都關我哋空姐事,仲要唔係空姐與乘客之間,而係空姐同事之間的矛盾。

你知啦,我哋呢啲港女空姐,大部份都好似王菀之咁討厭政治。但當燒到埋身時,今日睇報紙,先知原來連港龍空姐昨日都要齊唱《問誰未發聲》,工會而家更講明隨時發起罷工,真係好鬼勇武㗎!

是咁的,等Angelina解釋俾大家聽。首先,各位都知港龍航空係一間香港的公司,一向都係主要請香港人做空姐空少,本來都好地地。之不過因為港龍成日都飛大陸省市,所以後來就學精咗,開始請大陸人做空姐,咁樣有四大好處:

1. 大陸海關都有本土意識,見到香港的空姐過關,海關人員容易會諸多阻撓,check得好緊,但如果大家都係同聲同氣的大陸人呢,海關就會明顯鬆手好多,而且大陸政府覺得港龍幫手提升大陸的就業率,在政策上自然會多加配合,做起生意上嚟就易話為啦!

2. 大陸空姐的人工都較香港空姐低,cut cost大過天,梗係要多請。

3. 香港空姐響大陸overnight的時間,公司就要包酒店同埋俾津貼,咁要使好多錢(公司覺得),所以要請大陸空姐。例如嗰位係杭州空姐,咁本來的杭州overnight梗係畀晒佢,因為佢可以番屋企瞓,咁就可以慳番啲酒店錢。

4. 香港空姐養唔熟,耐唔時就搞工會運動,梗係要多啲請大陸空姐,分薄香港人的影響力啦。

本來公司咁樣做,香港空姐都不太反對,但後來的發展卻是愈來愈畸型。

好簡單,因為港龍近年要立志cut cost,所以就愈請愈多大陸人,繼上海和杭州後,而家仲想去埋北京請人,而且佢哋的飛行範圍並不限於自身城市,就算嗰位係杭州人,都會飛畀台中、高雄嗰啲 overnight筍盤,分薄晒香港空姐的機會,唔嬲就有鬼啦!

咁搞法,香港空姐本來僅有的overnight機會都被不斷剝削,於是成日都要即日來回,冇得出街,冇晒津貼,悶到抽筋。加上因為要cut cost,啲更愈編愈密,一日踩三場,仲要只係畀法定的minimum rest 12個鐘畀你,一放工就要瞓,瞓醒就要番工。

嗱,唔好同我講「咁多怨言咪唔好做囉」,你咁講同班維園阿伯叫人移民有咩分別呀?咁你平時又鬧梁振英。而家搞到空姐都要罷工搞抗爭,唔係我哋有心玩嘢,只係同佔領中環一樣,都係忍無可忍而已。

(原圖來自《蘋果日報》)

請支持我們持續發展,透過PayPal或其他方法贊助我們!
金額:
分類:|發表於2014年6月25日 下午3:42

發表評論

讀取中…
kit [email protected]社漫網誌│社漫網誌│守護者