逆嘶亭網誌│逆嘶亭網誌│逆鱗而上:認命主義 足以致命

簡卓鏗網誌│簡卓鏗網誌│一個單車環球的香港故事:上海街小店點樣挽救我單車之旅

2014-6-25 23:20
字體: A A A

話說我又嘗試搵嗰粒好難搵嘅螺絲。粒螺絲用嚟張前貨架鎖喺單車上面非常重要,早幾個月唔見咗之後,喺仰光我搵咗一個星期都搵唔倒,最後要喺細工場要人特登造幾粒俾我,最後全部係印度爛路上犧牲哂,要不斷更換尼龍繩死撐住。

都預咗唔容易搵。果然,單車舖,冇。五金舖,冇。

「呢隻工業用螺絲嚟架喎,你試下去上海街新填地街搵吓啦。」有個五金舖老細咁講。

喺上海街大大話話行咗廿零間舖頭,連專賣螺絲的舖頭一見都耍手擰頭。冇計啦,一睇就知唔係行內人,又唔係大生意。

最後行到呢間梁成記救咗我。間舖一啲都唔起眼,轉咗入內街舖位又細又舊,入去之前心諗:「唉,都唔方會有啦。」第一次去,老闆娘話而家唔會再搵到呢隻螺絲,但都照幫我度哂尺寸周圍問附近啲行家,又幫我搵勻全間舖搵咗幾粒似樣嘅貨,仲話唔啱可以拎番去退錢。行到身水身汗唔通真係為嗰四十蚊生意仔咩,見老闆娘咁好人你都咪話唔滾動。

第二次番去同佢講唔啱使,佢坐低幫我研究點樣可以整粒啱用嘅螺絲,仲幫我周圍借磨機,最終粒野太精細一磨就爆…老闆娘借咗把銼俾我番屋企試吓慢慢磨,叫我得閒行過還番俾佢。嘩!三唔識七就俾埋啲搵食架撐我帶走…啲人情味就嚟淹死我。

跟住番屋企磨完發電個絲帽唔夠長,第三次向老闆娘求救,佢又幫我班咗啲駁螺絲嘅嘢番嚟,再醒多樽螺絲膠俾我做固定。都唔知係咪前世欠左我嘅…

搞咗成個星期終於搞掂,早兩日番去還工具,已經實在忍唔住影張相分享吓。

唔係話小店一定好,但係大舖真係全部都態度好差咁想趕我走…多謝您,老闆娘。

都係嗰句,行得出第一步,個世界會幫你解決淨低嘅其他問題。

請支持我們持續發展,透過PayPal或其他方法贊助我們!
金額:
分類:|發表於2014年6月25日 下午11:20

發表評論

讀取中…
即時關注|梁齊昕唐青儀交換鞋着?