初訪日本｜生活旅客博客

香港女特首林鄭被影到喺出席日皇登基典禮玩手機失禮國際，事後更發佈大媽式「抗辯」文稿而柒出宇宙嘅「壯舉」，令我都想贈吓興，講吓日本。

對於好多香港人嚟講，去日本可能多過去大嶼山。但對於我嚟講，今年10月7號卻係人生首次踏足櫻花之國。

可能因為對日本人嘅「禮貌」期望太高，亦可能因為到埗之日係10月7號，十足的「柒」，初到貴境嘅我，對於由機場搭 shuttle去酒店遇上嘅嗰位巴士司機，就真係有驚冇喜：因為巴士路線上冇入住酒店exactly嘅站名，曾經3次喺停站時用 Google翻譯，好有禮貌咁請佢喺到站嗰陣單聲，佢都愛理不理。最後到站時亦係靠自己睇到酒店名而落車，佢完全亦冇提醒，好令人失望。或者，真係任何地方都有衰人吧。

而另一次搭 JR，放工時間，坐喺關愛座嘅人個個耷低頭，對企喺面前嘅長者視若無睹，亦係另一個現實。

不過總體嚟講，日本人係有秩序同守規矩。但講真又唔覺得比臺灣人或者香港人更有禮貌，都係正常發揮而已。可能只係因為以前臺灣人或者香港人唔係咁有禮貌，比較之下就覺得日本人有禮貌。今時今日，受過教育嘅臺灣人同香港人都好有禮貌，就冇咁大落差了。

最令我印象深刻嘅反而係入住酒店面對嘅東京灣，晨昏各有景緻。好靚。

另外，就係淺草雷門寺嘅願望版，掛滿嚟自香港遊人嘅「願望」。

11號離開東京，剛好避開12號吹到日本嘅60幾年嚟最強颱風海貝絲。如果遲一日，可能就要滯留喺酒店，睇到颱風下東京灣嘅另一種風貌了。

日本，下次再見。

2019. 10. 24

入住酒店面對嘅東京灣，晨昏各有景緻，好靚。

嚟到東京，迪士尼係必到之地。

迪士尼夢幻城堡。

晴空下嘅東京塔。

參觀明治神宮，咁啱睇到日式傳統婚禮。

淺草雷門寺嘅願望版，掛滿嚟自香港遊客嘅 「願望」。