范析852│清算吳亮星 共犯十九罪

黃軍禮網誌│為什麼我們不可以放過吳亮星

2014-6-28 13:01
字體: A A A

今期「聞東聞西」不談國際關係,因為由吳亮星和一眾建制派在主演的粗暴鬧劇,更讓我震驚。

呢張咁巨型嘅咭,係我最近去我班前學生畢業典禮嘅時候收到的。我好感激佢哋,因為我自問我唔係一個好成功的老師:唔識控制秩序,臨走之前又因為慵懶,冇兌現承諾一人一咭。大家只記著我的好,過咗兩年仲記得我,其實真係讓我感到受寵若驚,甚至有啲慚愧。

當然,當初會做老師除咗因為恩師邀請,希望以生命影響生命,亦都係我其中一個目標。作為一個社會科學院畢業生,叫做關心社會,當然希望盡一分力令學生能夠明事理,知道呢個世界,我哋嘅香港發生咩事。

後來,為咗追逐自己嘅傳媒夢,我無再搵教職,讀完碩士之後,輾轉去咗《信報》,然後嚟咗《852郵報》。然後發覺完全「中伏」,工時長到痴線,無晒私人生活,幾乎覺得冇晒朋友,而揭露真相的後果,某程度上是你知得越多,你越會感到香港的不可救藥。成個中共政權壓落嚟,你點擋?

但係,見到昨晚財委會如此粗暴通過新界東北發展撥款計劃,我第一時間諗起嘅係呢張咭,同我班學生。我記得我有個成績唔錯嘅學生話想考演藝,我即刻話:「目標明確,好事!」。

但返到屋企諗深一層,都會為佢打算進入香港演藝界呢個收入極貧富懸殊嘅圈子擔心。見完昨日焦媛寫嘅嘢,仲驚;佢另一半高志森,而家因為盛事基金一身蟻;但係當初,就係因為你同政府friend,先有呢個基金。

其實,我真係唔會怪責唔關心政治嘅人,佢哋本身有太多嘅局限。但係,我班學生似乎好多都唔係咁樣。佢哋寫咭俾我嘅時候,都係叫我由一個火坑跳去另一個火坑要好好努力,頂住唔好被河蟹。我為佢哋感到擔心,因為佢哋似乎已經知道呢個香港發生緊啲咩事。

其實如果係太平盛世嘅話,我都唔想捱住份低人工做「不受尊重」嘅記者,仲要係連唔少行家都唔尊重嘅網絡媒體記者。但係,依家嘅香港,政府嘅所作所為一日比一日核突,下一代嘅生存環境,亦都越來越唔健康。我唔希望,我班學生會好似我一樣,時時對社會不公忿忿不平,卻一直感到無能為力。我更不希望他們未來要為了五斗米,被逼委曲求全,成為今日我們都討厭的這班建制派。

讀者們,行有餘力的話,為香港的下一代做些甚麼都好吧。未必一定要走出來抗爭,同你屋企人解釋一下,話俾佢哋知唔好淨係睇TVB,唔好唔記得吳亮星做過啲乜,話俾佢哋知立法會發生咗咩事。佔領中環、搞公投唔係搞搞震,而係官逼民反,不得不發。解釋呢啲,可能已經係一場功德。

為香港,就算敵人多強大,也做些什麼吧。

請支持我們持續發展,透過PayPal或其他方法贊助我們!
金額:
分類:|發表於2014年6月28日 下午1:01

發表評論

讀取中…
擇宅藍網誌│地產講呢D│唔買唔知時運高 即買即知老乜土