即時關注│擬來港七一遊行 陳為廷下午再闖關

阿健網誌│一個聞得出我食過乜嘅天才型仔客

2014-6-29 12:01
字體: A A A

大家記唔記得我上次呼籲大家去投票呀?你哋投咗未呀?你睇吓早兩日粗暴咁通過咗呢個東北撥款,你就知道宜家個政府幾咁不知所謂!再係咁,香港真係玩完架啦!今日係投票嘅最後一日,未投就快啲投啦。仲有,過兩日就七一,你哋知道應該點做架啦,到時見!

講番工作,早幾日早上滂沱大雨,又冇客,又肚餓到不得了,於是索性泊低架車去食嘢,食我嘅至尊組合,沙爹牛麵加蛋配熱咖啡,呢個組合我食幾廿年都唔會厭呀!見天氣稍為好轉就拿拿淋開工,車咗個短途客後,就有一個型仔上車,佢一上車講完要去邊之後,同佢傾咗兩句,佢就話好肚餓,好想食沙爹牛麵,問我頭先啲麵好唔好食。我當堂嚇咗一跳(你唔係跟蹤我呀?!)。

後尾先知佢原來係個品酒師,自少味蕾、嗅覺特別敏感,對食物特別有要求,佢仲話細細個已經入廚幫阿媽手,大個咗就對酒類產生興趣,所以投身咗呢個專業。咁佢聞到我沙爹牛麵味道,一啲都唔出奇啦。

我諗番起好耐以前,好似喺收音機聽過有關金庸嘅介紹,話佢喺好叻、好好記性。話說有次佢同班朋友去食飯,想試間新菜館,之後搵咗個電話去訂位。事隔一年後,佢哋又想再去,但已經冇人記得個電話,唯獨金庸記得到,所以話有啲嘢係天生架,天分係有高低嘅,叻啲就係叻啲,冇得講嘅。

不過,我深信天生我才必有用,後天嘅努力都好緊要。就好似我咁,揸咗咁多年的士,我敢講香港九成街道我都識去,呢啲咪我哋嘅專業囉。

請支持我們持續發展,透過PayPal或其他方法贊助我們!
金額:
分類:|發表於2014年6月29日 下午12:01

發表評論

讀取中…
B4網誌│B4網誌│底線傳底:黑哨