【港版國安法】中聯辦聽取人大政協國安法意見 駱惠寧強:決定了的事,就會堅決地做

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

移民|生活旅客博客

2020-6-6 21:00
字體: A A A

自從港版国安法將會出籠嘅消息一出,移民一詞又馬上成為熱搜。

事實上,自舊年逃犯條例事件開始,以柒婆為首嘅港共政府妄顧民意,引伸到連續嘅警暴、抗爭、721,以至攬炒派嘅出現,身邊已經好多朋友不斷問我關於移民嘅事,亦有朋友已經在進行中。

但一場疫症,似乎令一切都暫停咗。好多朋友亦因為自身唔同嘅考慮,諗住可以過一兩年後再搞。亦有朋友嘅案例啱啱搞到一半,卻因為疫症而冇辦法繼續進行,被半天吊,唯有等。更有朋友因為臺灣喺3月加辣咗投資移民嘅要求同限制而擱置咗移民嘅打算。

但国安法嘅出籠,又忽然令到這些朋友變得急燥不安,不斷諮詢移民公司點樣做。原本諗住喺香港搵多幾年錢嘅、等資產安排比較妥善嘅,以至已經擱置咗移民計劃嘅朋友都重新積極投入移民部署,而且比之前顯得更決斷。對可能搵少咗錢、低價賣出資產,以至因為移民要承擔嘅更大開支,都似乎唔再顧慮咁多。

無論国安法宣佈出籠之前或之後,當有朋友(尤其係一啲極心急嘅朋友)問我意見,我嘅睇法都係一樣。今次就趁這個熱議題目分享一吓,亦希望集思廣益。

點解要移民 ~ 這包括push(推)和pull(拉)嘅因素。

1. 所謂「推」嘅因素,係香港有咩係令你覺得非走不可嘅原因,而「拉」嘅因素,就係你心儀嘅移民地方有咩吸引你。

當然,凡事亦要睇兩面。即係當考慮香港令你要走嘅原因時,亦要小心諗吓有咩令你需要留低 / 係咪非走不可?同樣,你心儀嘅地方有吸引你嘅地方,亦一定會有你唔適應,或需要你犧牲某啲喺香港擁有嘅嘢, 而你又係咪真準備好承受?

兩方面嘅「推」同「拉」嘅因素都應該考慮周全,唔好只憑一時衝動,或者單一嘅push因素就做決定,至可以減少將來後悔嘅機會。

2. 心態 ~ 要移民,就要準備接受全新嘅生活模式。即使文化再相近嘅社會,都唔會完全一樣,所以心態好重要。

其中最重要嘅心態之一,就係要接受凡事皆有「取捨」(Give and Take)。而先做好上述第一點講嘅 「推」和 「拉」因素嘅分析,係幫助自己調節好「取捨」心態嘅基礎。

簡單啲講,如果喺第一點所述及嘅「推」同「拉」因素中已清楚了解自己移民要達到嘅目標,同需要付出嘅成本,再作出決定,就可以因為有更理智嘅取捨準備同心態,而能夠更從容咁接受因此而需要面對嘅結果。

3. 睇長遠啲 ~ 移民最切忌一時衝動。要諗清楚自己未來日子可否喺新嘅地方長期安居樂業。這包括心理上同經濟上。

心理上嘅因素上面已經講到,唔再贅述。而經濟因素亦至關重要。無論係為仔女或為自己,移民後點樣保證收入來源,或者因為收入嘅減少而要調整生活品質嘅情況都需要有預算,至唔會令自己走入困境。

4. Contingency 後備方案

以管理嘅角度,任何計劃都應該有後備方案(Contingency),移民亦唔例外。

這處講嘅後備方案,包括移民成功後遇到現實嘅問題(譬比如適應上、經濟上)點樣處理,甚至有冇可能需要回流,以至如果移民申請唔成功,要留喺香港繼續生活,點樣自處,都要考慮到。

總而言之,移民應該係為咗可以過比而家更自在嘅生活為目標。如果只係為咗逃避某種恐懼感,純粹以情緒主宰而令自己要面對更大嘅壓力,就絕對絕對需要三思再三思。

畢竟,我哋最需要恐懼嘅,係恐懼本身。即使決定移民,都必須做好部署,千祈唔好急就章。所謂淡定至有錢剩。

但願「我心安處是吾鄉」。願香港人共勉。

2020. 6. 5

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2020年6月6日 下午9:00

發表評論

讀取中…
【港版國安法】楊雪盈形容特別會議「史無前例」 批政府不承認屬「自欺欺人」(有片)