港版國安法出草案說明,擺明話中共特務大晒!

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

罷韓|生活旅客博客

2020-6-20 21:00
字體: A A A

雖然遲咗啲,但都想講番吓高雄666罷韓嘅「創舉」。

有香港建制中人引用臺灣親共名嘴趙少康嘅「高論」,認為用1/4贊成票(57萬票)就可以罷免以一人一票民主選舉選出嚟、曾經攞到89萬支持票嘅市長,係好兒嬉,亦係執政民進黨操弄權力嘅假民主,對此好不以為然。這種轉移視線、以偏概全嘅謬論,對於呃一眾同溫層嘅支持者或者可以,但放諸陽光底下全面驗證,則無疑於自暴其極度無知同愚昧,或者係別有用心,想誤導公眾。

首先必須搞清楚嘅係數字,其次係整個罷免程序。

高雄合資格嘅選民約230萬。

18年嘅9合1選舉,兩位候選人韓国瑜同陳其邁,分別得票89萬及74萬,即總投票票數為163萬,投票率約為71%。

到咗20年111總統選舉,以高雄計,韓国瑜得票61萬,蔡英文得票101萬,即總投票票數為162萬,投票率為70%。

到20年666罷韓投票,贊成罷免票接近94萬,反對票約為2萬6千票,總投票數目為96萬6千票,投票率為42%。

按照韓国瑜被罷免後嘅講法,有成130幾萬人冇出嚟投票,嗰啲都係反對罷免佢嘅。這種自欺欺人嘅笑話,的確同當日港共政府話當有200萬人行出嚟反對修訂逃犯條例,就表示重有500幾萬冇行出嚟嘅人係贊成修訂嘅,係同一種思維模式。唔怪之得當日韓国瑜嚟香港見到柒婆時,兩件嘅表情咁投契啦。

講番罷韓嘅數字,首先,唔出嚟嘅人可以有好多原因。如果韓話唔出嚟嘅係反對罷免佢,咁大家亦可以解釋為唔出嚟嘅係唔反對罷免佢,或者係默默認可罷免佢,英文稱之為silently agreed.

事實上,以市長同總統選舉嘅兩次數據嚟睇,高雄230萬選民中大約只有7成人,即約162萬會真係出嚟投票。如果以此為基礎,則94萬人贊成罷免韓国瑜,就佔咗真係會投票人口嘅近58%了。

另外就係成個罷免程序,並非只需要1/4合資格選民同意就可以罷免。這只係其中一項要求而已。

罷免係要過3關 ~

第一關,係要有3萬個以上嘅實名聯署。

第二關,係要喺第一關達到指標後,喺30日內達到30萬個以上實名聯署,即係平均每日要有1萬人實名聯署。

要注意嘅係實名聯署嘅要求非常嚴格,要嚴格按照中央選舉委員會(中選會)編制嘅表格,詳細填寫聯署人各項私人資料無誤至可以成立,絕非香港嗰啲擺街站或網上簽名求求其其就當係聯署。換言之,單就第一同第二關可以通過,就已經表示有起碼30萬選民,係極其認真要提出罷免要求了。

另外,罷免嘅時序亦有嚴格規定。雖然韓国瑜做咗市長冇耐已經恆常性請假出外週遊列國,競選前嘅誇誇其談亦全部落空,更甚者唔理市政走去選總統,已經令好多高雄市民,尤其係曾經畀佢呃咗選票嘅人忿忿不平,想即刻罷免佢,但根據選委會規定,都要等佢做夠一年,畀足機會佢之後先至可以提出罷免,唔係話一時睇佢唔順眼,就可以話換人嘅。

而罷免嘅第一、二關通過後,到正式投票前,被罷免人亦可以提出停止罷免呈請。事實上,韓国瑜喺投票前亦曾經3次提出停止罷免呈請,但因為理據不足而遭法院駁回。

再講番數字,要罷免成功,贊成嘅投票率要達到選民人數1/4(57萬票)只係其中一個要求。另一個要求係贊成票必須多於反對票。換言之,如果真係好似韓国瑜所講,130幾萬冇出嚟投票嘅人係反對罷免佢嘅話,咁假如佢哋出晒嚟投反對票,即使有94萬票贊成罷免佢都冇用,係唔會罷免得到。

但事實上,喺投票前,韓国瑜為咗希望投票率不足選民人數嘅1/4而令罷免失敗,曾經好積極咁呼籲市民唔好出嚟投票。換言之,佢完全冇信心反對罷免佢嘅人係會多過贊成罷免佢嘅人,同時亦低估咗高雄市民罷免佢嘅決心。

最終,有接近94萬人贊成罷免佢,超出咗當日投票畀佢做市長嘅89萬人。而130幾萬冇投票嘅人,卻變成佢跌落地嗱番扎沙嘅「被支持者」。反而堅挺佢而投反對罷免佢嘅2萬6千幾件鐵粉,卻冇聽佢再提起過,實在有啲情何以堪。

無論如何,高雄市民運用手上嘅一張選票,和平有序而堅定咁踢走一件欺世盜名嘅詐騙政棍,係彰顯民主嘅最完美示範,實非某啲香港建制人士可以理解同望其項背。

2020. 6. 19

高雄市罷免市長韓国瑜嘅投票通知書。

666一早出門投票罷韓。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2020年6月20日 下午9:00

發表評論

讀取中…
【港版國安法】中央將在港設維護國安公署 國安法凌駕本地法律人大擁解釋權