新聞短打│再暗批泛民非「急市民所急」 財爺無視梁特言行不一

阿健網誌│有啲錢,的士佬其實都唔想搵架!

2014-7-6 11:02
字體: A A A

香港人畀啲掌聲自己,七一遊行無論係九萬幾人,定係五十幾萬人,甚至更多都好,香港人原來仲係熱情如火,雨水、汗水、淚水,實在好感動,加油呀!

呢個禮拜都無乜特別嘢好講,就講講早兩日個熟客Apple,一上車就大吐苦水,話前日坐的士去機場,帶咗一件小行李,件行李放喺前座位;點知個司機話要收費,佢心情唔好就同個司機拗起上嚟。

我聽到呢度就笑咗一笑,話個司機其實無錯呀,佢係有權收費架。就等我今次同大家講吓的士嘅額外收費啦。

行李收費嘅定義,其實放喺車廂內或車尾廂,都要收費。好多客人都以為放喺前座或後座就唔駛收,其實唔係架,只要件行李長闊高加埋超過1米40就要收費架。寵物就逐隻計,輪椅就唔收費,不過BB車就要嘞。

另外,之次都講過,如有客人嘔吐,係會收車廂清潔費;多少係冇定,法例規定只要將收費金額喺車廂當眼地方清楚寫明就得。我都講過清潔車廂好麻煩,我哋做司機嘅,都唔希望收到呢個費用。

短加長減大家都知啦,咁唔講嘞。講吓啲冚旗的士啦,有乘客會問(或用手勢)司機係咪過海,係唔係收單程隧道費,其實我對收單程係有保留嘅,因法例規定係唔可以減費拉客,如果收單程即變相減價啦,只有喺過海的士站先會收單程費。所以「八折的」都係唔合法架。

其實我自己好多時都唔會收呢啲費用,講真都唔係好多,只要你有禮貌,講聲唔該,又有乜所謂呢!

(香港警務處圖片)

請支持我們持續發展,透過PayPal或其他方法贊助我們!
金額:
分類:|發表於2014年7月6日 上午11:02

發表評論

讀取中…
陳玨明網誌│恨香港100個理由28──They can’t arrest us all