中共忽發文革式「通知」,預示大陸就快出事!

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

等|生活旅客博客

2020-7-4 21:00
字體: A A A

人生係一場旅行,但當中少不免等待。

等搭飛機、搭船、搭車……

記憶中最漫長嘅等待,係有一年出差去河南。嗰陣唔係日日有直航。我同兩個英國同事要先飛去北京,再轉飛鄭州。

因為天氣關係,我哋滯留咗喺北京機場。等咗成日,最後都飛唔到。

於是我哋決定先去機場附近酒店過一晚。由於行李都已經寄倉,又適逢寒冬,我哋都唔夠衫著。幾經轉折,同機場人員商量呈請,終於獲批准自己入去寄存倉度攞番啲行李。講都冇人信,我哋3個係由行李帶嘅輸入口爬入去地庫嘅寄存倉搵番自己嘅行李,再由輸送帶帶著行李爬番出嚟。

去到酒店,3個人第一時間入房由頭洗到落腳,再喺餐廳集合大吃一餐幫自己壓驚。

第二日一早又去機場等,結果居然係重覆第一日嘅劇情。但因為有第一日嘅經驗,到第二日再一次喺行李輸送帶爬出爬入,居然變得好熟練。當然,第二晚再折返酒店,又再大吃大喝一番為自己打氣啦。

到第三日,我哋3個學精咗,冇再寄存行李,決定等到飛機真係可以起飛時再算。

結果等到接近下就5點,知道都係飛唔到,就一齊由機場坐的士直奔火車站買去鄭州嘅火車票,由陸路過去。

我哋好彩買到4人倉嘅高級車飛,3個人坐,冇其他人,就坐咗7個幾鐘頭火車由北京到鄭州,到達時已經零晨兩點。

當年這個神奇嘅經歷,今日回想起嚟仍然覺得好有趣。

年紀已長,今日坐喺屋企,等疫情過去、等臺港兩邊互相開關、等生活回復正常,卻有種好遙遠同不可知嘅感覺。有時會諗,唔知重要等到幾時。

如果將來有機會回顧這段日子,相信唔會有今日回顧當年河南之旅嘅刺激有趣感覺,而只會有無奈同茫然嘅感慨。

始終,年輕都係更勇敢更充滿希望嘅。

2020. 6. 29

 

(圖片來源:北京电视台青年频道 China BeijingTV Youth Channel YouTube影片截圖)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2020年7月4日 下午9:00

發表評論

讀取中…
【立會選戰】何君堯促票站加裝閉路電視 選管會:投票保密是重要原則