【武漢肺炎】8.1衛生署醫管局記者會(有片)

生活旅客

-生活。旅行

在香港成長嘅港女。因緣際遇停留過在唔同嘅地方生活,經歴有趣嘅人和事。 今年會搬到岡山,機緣巧合開始幫 852 郵報寫週記,分享在生活旅程中嘅所見所思。

禁堂食|生活旅客博客

2020-8-1 21:00
字體: A A A

政府因應第三波疫情,宣佈7月29日星期三開始,全天候禁止所有餐廳食肆嘅堂食。

之前禁咗晚市堂食,已經令業界損失慘重,亦為好多返夜班或收工晏嘅打工仔帶嚟唔方便,但都總算影響有限。

早午禁堂食令一出,卻全城受難。適逢當日又忽然天降大驟雨,一眾基層同打工仔喺暴雨下踎街食飯盒嘅淒涼奇觀即刻喺網絡廣傳,令香港這個號稱世界金融中心嘅大都會彷如第三世界,令人慘不忍睹。

其實除咗打工仔同基層,好多老人家都受影響。比如我住嘅屋苑樓下嘅酒樓,一向都係一眾退休街坊每朝飲茶吹水嘅地方。疫症爆發以嚟,或因政府政策,或因自主防疫需要,酒樓已經開吓停吓,非常艱苦咁經營。

好多退咗休嘅公公婆婆,仍然堅持每日去飲早茶。吹水少咗,各自坐開,但可以見到吓啲茶友,打個招呼已覺開心。係艱難日子中嘅些微慰藉而已。

酒樓亦好認真做足、甚至做突各種防疫措施。除咗入去要量體溫同消毒雙手,更高溫蒸晒所有食具至擺上檯。而且更間晒包廂,每箱只放兩檯,每檯亦跟足政府規定限制嘅人數。

點知全日禁堂食令一出,公公婆婆哋都極度無奈。有啲就唯有買點心外賣返屋企自己沖茶飲。有位識得
嘅伯伯就講咗句 「人在屋簷下,豈可不低頭」嘅感慨。

或者因為實在眾怒難犯,今次政府跪得好快。星期三嘅狼狽情況一出,星期四就宣佈喺星期五可以恢復早午堂食。

屋苑樓下嘅酒樓亦徇眾要求,即刻儘快安排復市,令一眾茶友為之雀躍。

其實喺疫市下嘅飲食業真係已經頂得極之艱苦。好似屋苑樓下間酒樓,與其話佢哋為做生意,我而家反而覺得佢哋更似係打救一眾茶客嘅慈善事業,為啲公公婆婆提供苦悶漫長嘅日子中嘅些小安慰,同滿足卑微嘅願望,令佢哋覺得日子重稍稍可以維持正常而已。

當然,對於星期三焗住要喺高溫驟雨下踎街食飯嘅基層,可以飲茶嘅公公婆婆都已經唔可以稱得上有咩慘啦。

總之,政府防疫被動甩漏,全香港市民埋單。

人禍,其實總係甚於天災。

2020. 7. 31

實施咗只1日嘅全天候禁堂食令引發眾怒,政府罕有咁即時跪低,宣佈可以恢復早午堂食。
屋苑樓下酒樓亦徇眾要求儘快作出復業安排,並貼出非常暖心嘅告示。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2020年8月1日 下午9:00

發表評論

讀取中…
中共計錯兩條數,搞到香港玩能完!