許仕仁案今日重點│證人指許仕仁曾倡取消西九單一招標

B4網誌│寫在德巴大戰後 – 我都係食咗個Keyboard 佢算啦

2014-7-9 22:28
字體: A A A

記得當年有名足球專欄作家豪言,如果伯明翰能拿到任何一個冠軍,他就食咗個keyboard佢,結果伯明翰果然勇奪2011聯賽盃冠軍,他就俾網民集體追數,到現在仍有人回帶恥笑他。今日巴西令人跌眼鏡的程度,比當年伯明翰奪冠更甚,試問有誰能夠估到巴西在6分鐘內連失4球? 枉我還說巴西能看高一線,看來我都要步該位專(欄作)家後塵,搵定個keyboard食咗佢。

講番場比賽,戰術分析好多人都寫過,主要都係因為史高拉利太過進取,想在早段搶攻,但防線壓得太上,製造了大量空間予德國打反擊 ; 加上堤亞高施華缺陣,防線失去指揮,終於在一次防守角球時出事。失波之後巴西心急要追平,但愈急就愈亂,愈亂又令球隊更急,惡性循環下,就出現了六分鐘失四球的悲劇。

想一開波谷一輪唔係錯,但問題係點解要用出名性格輕佻的大衛雷斯做隊長?須知隊長作用舉足輕重,是足球場的精神領袖,你用一個神經刀做精神領導,佢咪發神經俾你睇,仲要搞到成隊波一齊發神經。尤其係在短時間失第二、三球後,球隊理應有人挺身而出,先穩住節奏,再圖反擊;可惜那個人沒有出現,反而整隊繼續依然故我,在後場胡亂搓波扭波,到失第四、第五球時,已經恨錯難返,永不翻身了。

巴西的球迷十分熱情,難得在主場舉辦世界盃,當然盲撐自己祖國,當咗佢哋係外星嚟嘅宇宙最強,場場唔止要贏,仲要贏到盡。我初初都以為依啲係動力,令到球員會搏盡比賽,點知原來係壓力,壓得他們不敢打守勢足球。之前球隊夫添上陣,對手相對較弱,他們主攻還能取得一點甜頭;今場前後核心均缺陣,還要面對老狐狸德國,經常斷開兩截的巴西就難逃一場大敗。

另外也不得不稱讚德國,雖然巴西是有明顯的漏洞,但是能在短時間把握對手的混亂攻入四球,德國的紀律和戰術執行能力已臻極致。德國隊缺少可以以一人之力改變戰局的球員,可是他們的基本功和紀律,卻令他們可以捉住對手很少的漏洞,迅速去建立勝果,小組賽第一場對葡萄牙,以及今場對巴西都是代表作。友站今日出了一篇文章,說德國隊如機械人踢波,是殺死了足球,可是他卻不知道紀律其實也是足球的重要一環,苦練戰術跟苦練技術同樣值得人尊重。

在昨晚的震盪後,今晚的另一場四強注定難以追趕德巴大戰的鋒芒,說穿了這場比賽就是洛賓與美斯之間的較技,要我預測賽果?一個keyboard已經夠我食了,我可不想再食多個呢。

(圖片來源: BBC Sport)

請支持我們持續發展,透過PayPal或其他方法贊助我們!
金額:
分類:|發表於2014年7月9日 下午10:28

發表評論

讀取中…
范析852│聖公會續死撐「維穩講道」 宗教界反佔中早有跡可尋