Dr. Y網誌│不存在的孩子

阿健

-的士佬手記

我叫阿健,的士佬一名,食塵多過你食米,揸車多個你行路。揸一轉的士,甜酸苦辣喜怒哀樂通通見齊。得閒嘅,咪上嚟聽吓我吹水囉。

阿健網誌│的士生涯原無奈

2014-1-1 10:30
字體: A A A

大家好,我叫阿健,行家多數叫我做Fit 佬(其實係肥佬),但大部分人都叫我做「的士佬」。唔使講,我係揸的士嘅。

我已經四十幾歲人,揸咗的士有六、七年。你問我點解會走去揸的士?咁一定唔會係為興趣啦大佬!梗係為生活啦!!!想當年,好聽啲咪又係因「香港經濟高速發展」、「生產線電腦化取代人腦化」,唉……被大社會迫於轉型的一群嘅我,其實以前係做印刷嘅,每日朝九晚八,由廿頭做到三十尾,公司一話電腦化喎,減少人手喎,咁就收咗皮囉!當時都幾震㗎,好在我廿幾歲時為左溝女考左個車牌,咪拿拿淋走去考返個的士牌囉,又好彩一take搞掂喎,咁就揸左幾年喇!

講真揸的士真係好自由,鍾意開工就開工,風濕骨痛咪休息囉,不過就要自負盈虧,最筍就係唔使交稅。但係香港地揸的士都唔易㗎,車租又貴、氣價又貴、路又窄、人多車更多、塞車多過乜,真係好辛苦。遇着啲無禮貌嘅乘客,仲要谷住成肚氣,收到張牛肉乾仲白做添呀!

仲有,你哋咪以為的士佬好冇文化、好冇學識呀,其實錯錯錯!!!我身邊好多行家未揸的士之前,有啲係小學教師、工程師、做老闆嘅都有,又有退休消防員、退休警察,好多仲識英文同好有禮貌添,咁當然有例外啦……嘻嘻!好似我呢啲有文化有水平嘅司機,遇到啲 PK客都會扯火㗎。唔知係咪PRC文化入侵咗本土文化,搞到香港PK客越來越多。點PK法?下期先同大家分享。(阿健)

(每個的士司機都各有自己的故事,本文之的士佬跟圖中的就未必一樣。)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年1月1日 上午10:30

發表評論

讀取中…
有情360網誌│愛的平均時間