稍一不慎，粉身碎碗！｜銘爺｜的士佬隨筆

百年道行一朝喪，
金飯碗變玻璃碗！
小弟仲係細路果陣，
間唔中都聽到啲成年人講，入到政府做公務員就冇死囉！
薪高糧準、醫療津貼、居住津貼、退休金……攬到你實一實，幾溫暖都有！
最重點嘅係，只要你冇孭大鑊嘢，穩穩陣陣就可以做到退休，食長糧，個個月有糧出，出到瓜老襯，簡直係金飯碗喇！
因爲要炒一個公務員，係一件好繁複嘅事，被炒嘅公務員，仲有兩次上訴嘅機制！
所以上級做到退休，都未必炒到個下屬！
除非你有辨法令到個下屬自己辭職啦！
一個酸梅兩個核，
今時唔同往日！
家陣做公務員，要宣誓效忠邊個，又要效忠那個！
仲要日日提心吊膽，講錯嘢！
係啊！講錯嘢，唔係做錯嘢！
做錯嘢事小，
講錯嘢事大！
一個不能說（不）的政府，各位大哥大姐，揸穩隻碗，稍一不慎，粉身碎碗！
到時一句國安法，
即刻可以拉人封艇，
鍾意炒邊個，就炒邊個！
正如三藏大師諗咒，
悟空都要即刻跪低！
喂喂喂！
阿銘爺！
安身立命嘅地方，
瞬間變左亂葬崗！
開工啦！
下一站：
石排灣邨

（圖片來源：台灣蘋果日報）