即時關注│工聯會遊行阿姐 稱「反中央」撐「張融」

阿健網誌│靚女的士變臉記

2014-7-13 12:03
字體: A A A

今次世界盃真係估你唔到,我嘅愛隊巴西隊居然輸畀德國七個一皮,仲破咗好多「最差」嘅紀錄,睇到我心都傷埋,巴西足球王國呢個名已經蕩然無存,嗚……嗚……

早幾日收工約咗好朋友肥仔基飲茶,原來佢啱啱去咗四川旅行,更有機會睇到「變臉」嘅表演,雖然佢話唔係國家級,但佢講到眉飛色舞,想像都非常精彩。但係真係估唔到,第二日開工,自己都見識到本地嘅「變臉」。

嗰日朝早七點半左右,喺上水經過一個屋苑,見到一名女士啱啱喺大廈出嚟,估到佢要車就駛埋去。「中環廣場,唔該。」嘩!接到支大旗呀,正呀!

佢上車後,喺倒後鏡睇睇佢,普通女士一名,於是沿途只專心揸車,但都知道佢一路喺度化妝,我都冇乜理佢,去到差唔多海底隧道嗰時,佢問我可唔可以噴一下香水?of course!我話冇問題。當佢噴完香水(啲香水真係好香),我好奇心之下從倒後鏡偷望一眼,嘩!嘩!不得了呀,上車時外表係剛合格,宜家起碼九十分呀!

去到目的地,小姐知道我偷望佢,笑笑口同我講,話要見客,無法啦。真係估唔到「唔使一個鐘,變臉好成功」。唔怪得聽過有啲日本太太要老公瞓咗先落妝,醒前化好妝,原來前後可以差咁遠架。

之後一名後生仔上車,去柴灣工業城。呢個男仔睇落唔夠三十,衣著前衛,上車後唔知佢睇乜,初初以為喺度玩電話,後來先知佢喺度照鏡,仲攞咗把眉鉗修理眉毛,修完又補粉,最後仲噴埋古龍水,我估佢應該係「磨掉」,仲姿整過頭先嗰位女士。

佢落車後,人有三急,揸車到杏花邨油站去廁所,睇到鏡上嘅自己,唉!怪不得人哋叫我做的士佬,原來真係好「佬」呀,麻甩佬!

由於變咗阿佬,都係時候補補佢,我決定畀自己放吓假,叉叉電,所以下星期的士佬暫停一次。

(網絡截圖)

請支持我們持續發展,透過PayPal或其他方法贊助我們!
金額:
分類:|發表於2014年7月13日 下午12:03

發表評論

讀取中…
陳建平網誌│《逆權大狀》男主角 韓國版梁朝偉