8仔日記∣高鐵調查報告三大古惑落釘位

史物夫網誌│國富論|商界為何未發聲?

2014-7-16 21:52
字體: A A A

「試問誰還未發聲……」呢首詞,好入腦,我老史久不久聽到,都會真係諗下,仲有邊個未發聲。

唔知大家有冇留意,正當商界出錢出力反佔中,但係好似除咗非常少數大膽商人,冇乜聽過有邊位出來挺身撐政改。

最主流解釋,就係連思歪本人都唔想政改過關;呢位低民望特首,又冇選舉機器,有普選,唔駛打都已經輸硬啦。所以,陰謀論去諗,政府唔去發動商界撐政改,低調地等個方案難產,思歪就可以順利打多一屆,順便再處理埋啲難哽嘢,例如廿三條。

另類一個非常似樣嘅解釋,就係反佔中,因為懷疑涉及外國勢力,所以反宣傳由西環負責;至於政改,屬本港份內事,由特區政府自行處理。

第三個可能性,就係家陣商界真係睬思歪都有味。事實上,傳統幾大商會已經極為不滿呢個政府,尤其是好多政策,例如標準工時,根本都冇商冇量。特區政府唔睇商會台戲,商會唔會反枱,但係對於政府求助,一律冷處理。當然,西環開聲又另作別論。

呢三個理由,當中並冇衝突,有可能每個都有的真實性。無論如何,今日中環同政府形同陌路,已經係既定事實,思歪孤立無援,反映治港必須要公務員同商界配合,呢個係港英時代嘅智慧,思歪真係識條毛咩。

不過,從逆向思維諗,北京既要整治公務員,對商界,又何嘗唔係整之而後快?所以,呢幾年北京既以利誘之,但又用各種方法去威脅商界;例如競爭法,老早就已經係商界頭上一把刀。再加多一個東廠老廉,你話唔驚就假。

我老史經常同班後生講,對付共產黨,唯有地產黨。但係血氣方剛嘅後生仔女,又點會聽得入耳?佢地覺得班財閥淨係為錢,北京只要控制水喉,就可以令財閥跪低。實情係,財閥冇錯睇錢份上,但係佢地都要諗,成幾千億利益,點都要保住,一旦香港畀北京完全控制,佢地容乜易畀人抄家?所以,佢地要保持香港響一個好微妙既平衡。

後生仔,今日睇唔明,或者第日佢地就知道,其實大家都係政治生態平衡好重要嘅一部分。勇武還勇武,記得要用腦。

 

(原圖取自:《香港將於33年後毀滅》截圖)

 

(作者:史物夫)

請支持我們持續發展,透過PayPal或其他方法贊助我們!
金額:
分類:|發表於2014年7月16日 下午9:52

發表評論

讀取中…
游清源 • 一分鐘游得理噏:689老友要金融界旗幟鮮明反佔中!