老豆化身蝙蝠俠教仔 低成本製作紅爆YouTube

史物夫網誌│國富論|支持立法會全體攬炒

2014-7-24 15:53
字體: A A A

識得我老史嘅人,都會話我係極端自由個人主義者。無問題,你話我係乜都無所謂,反正我都唔會少個崩,好人我自為之。

作為一個極端自由個人主義者,有兩個人生戒條:一,我嘅錢,點搵點駛點用,我話事,後果亦由我一個人負責,其他人「厚多士」,我必然同佢死過。二,對任何人都用同一個標準,人哋點對我,我就點對人,呢個叫公義。

壹傳媒老闆,人稱肥佬黎,對老史有知遇之恩,所以老史亦好敬重佢老人家。不過,肥佬黎做生意嗰種狠勁,無論員工抑或投資者,未必個個頂得順;當年老史都係因為「支持唔住」肥佬黎,連stock option都放棄,劈炮唔撈。不過,雖然唔再係賓主,但我仍然敬重佢老人家個份堅持,一直默默祝福佢啲天馬行空嘅計劃,有創造奇蹟嘅一日。

一直以來,肥佬黎都好落力促進香港民主發展,亦都有推動台灣開放市場減少政府干預。好可惜,兩個社會嘅既得利益者,都當佢係洪水猛獸,除之而後快。但話說回頭,肥佬黎從來都唔會叫手足做違心嘅事,諗返轉頭,我都有少少後悔冇幫肥佬黎撐落去。

肥佬黎嘅行事作風,好透明,將佢捐錢畀民主派當新聞,先至係怪現象。啲錢,又唔係你嘅,關人呀?有件自稱壹傳媒股東但又冇名冇姓嘅人,質疑肥佬搞到壹傳媒蝕錢,但又好闊綽咁捐錢。我老史只係問一句:「啲錢又唔係上市公司嘅,關你乜事?」

壹傳媒呢隻股票,同其他傳媒股一樣,都係膽小勿沾手。除咗互聯網帶來挑戰,廣告客戶買少見少,先係最大原因。自由行唔再Sexy,先唔見一班客。政府管一手樓銷售,又少一班客。依家又話要禁奶粉,再少一班大客。如是者,傳媒唔死先奇。話說回頭,壹傳媒不嬲都冇地產廣告,反而慣咗,亦係因為咁,壹傳媒老早就要諗點樣突圍,唔似得其他公司,嬌生慣養,以為唔憂做。家陣殺到埋身,咪又係一個二個老翻動新聞;一邊鬧又一邊抄,老史敢問呢班傳媒人學乜野嘢人扮有風骨?

講返肥佬黎政治獻金事件。其實嗰篇網文配合其他報道,成個大合奏,想帶人聯想,肥佬嘅錢來自美國佬,而美國佬就冇個好人。明晒。不過,今時今日中環,邊個的錢同美國無關?用呢一個原則去判鬥,四大家族十大國企,個個都收美國佬錢,條數又點計先?

不過,可以肯定,民建聯工聯會啲錢,一定冇美國來源。不過,佢哋嘅支持者響美國有冇生意,我就唔敢寫包單喇!更可惜係,呢兩個團體大量收入來自政府好多Programmes,作為納稅人,我條氣更加唔順喎!

當然,民建聯工聯會愛字頭幫黨出聲等,要錢有錢,有面有面,背後邊個發功,唔駛問阿貴。我老史好公道,大陸政府可以公然干涉香港政治,點解一個特區永久居民唔可以用自己錢去支持自己所信嘅政治立場?民建聯工聯會去信立法會主席話要查泛民議員,計我話,要查就所有人都查,最好全部啲嘢揚晒出來……噫,係喎,陳鑑林搵盛事基金老襯單案,點解冇晒下文?仲有,個班扮民主派,老史一直都好想知佢哋點解咁多錢搞局。

講到尾,攬炒最好,邊個話唔查落去就正衰仔!

(撰文:史物夫)(《蘋果日報》圖片)

請支持我們持續發展,透過PayPal或其他方法贊助我們!
金額:
分類:|發表於2014年7月24日 下午3:53

發表評論

讀取中…
即時關注│食環署宣布暫停進口福喜食品 多間連鎖快餐店均受影響