微博傳情網誌│推銷員給你的教訓

史物夫網誌│國富論│主場輸波有段古

2014-7-26 22:41
字體: A A A

「主場新聞好勁,點解你唔試下去個度投稿?」曾經有人同老史講,想紅,就要去主場。

點知,我都未投稿,主場就摺埋。東尼蔡篇臨別感言,令人覺得,香港失去主場,損失嘅係香港人。

話我老史冷血都要多口講句,東尼蔡話想做廣告平台,但係我又唔係好覺佢有「銷屎」四出搵生意。有生意人想做有心人,都唔知聯絡邊位啦!唔通真係打直線搵東尼蔡咩?文化人面皮薄,生意人何嘗唔係有尊嚴?或者文化人覺得,「銷屎」呢種下人,根本唔應該出現響主場啦。

廣告客戶就係咁衰,你唔搵「銷屎」去招呼佢地,佢地真係唔知道有你嘅存在。

「唔係下化?主場都唔知?點行走江湖呀?」老老實實,好多人真係唔知主場想擴大廣告收入。老史都算管過一個靠廣告支撐嘅媒體,第一件事,就係版面設計留有唔少廣告位。主場設計上好似無留廣告位,鬼知咩?

另外,江湖傳聞,東尼蔡等加入壹傳媒,假如你只係一個中層打工仔,你會唔會留「畢直」去主場落稿?

生意同志願,假如可以合而為一,當然「痾甚」。不過,假如志願未能夠成為生意,一個理性嘅生意人,一定會生意還生意,志願還志願。對股東,對員工,呢條線畫得清清楚楚,其實有一定好處。老闆想同自己錢去做自己想做嘅事,儘管去做。

生意,最緊係有市場。你有自由去判斷,話市場低俗無品味,市場亦有權話你曲高和寡,睬你有味。

只有東尼蔡先知道,究竟係因為策略同營運出問題,令到主場輸波,定係好似佢大佬話齋,係香港市場唔正常。

壹傳媒當年起壇,格言就係「四面受敵.八面威風」,被杯葛咁多年,肥佬都只係出過幾次聲。少少苦楚等於激勵,東尼蔡,我等你東山再起!

 

(原圖取自:http://www.com.cuhk.edu.hk/)

 

(作者:史物夫)

請支持我們持續發展,透過PayPal或其他方法贊助我們!
金額:
分類:|發表於2014年7月26日 下午10:41

發表評論

讀取中…
當香港失去「主場」