kit [email protected]社漫網誌│主場失利

阿健網誌│蔡x芬曾經係車上同我……

2014-7-27 13:35
字體: A A A

開工就度日如年,放假就一瞬即逝,眨吓眼就放咗個幾禮拜假。照吓鏡,依然係阿佬,唉!都係面對現實,拿拿淋開工啦。不過有時真係好得意,開工時揸住架車四圍兜都冇個客,放假時就等極都等唔到架的士,你話頂唔頂癮呢!

放假旅行時遇到個靚女,好鬼似Maggie Q,唔知係咪真係佢。喺香港,我都車過唔少名人明星。唔好以為佢哋都係不可一世,其實大部分都好有禮貌,客客氣氣,可能係本身修養,又或者顧及形象問題啦。

記得曾經車過童x玲,八、九十年代藝人,起初都唔記得佢係邊個,落車後上網睇睇,發覺佢比十幾年前更漂亮,誰說歲月不留人呀!

幾年前都車過蔡x芬,笑容滿面,好健談,可能係信仰關係,真係比初出道開心好多,宜家北上發展,再創事業高峰,一帆風順。

另一位係兩個孩子的靚媽x芝,雖然語氣有啲男子氣,但係都好有禮貌,性格好爽朗。
近日係紅磡遇到無記小生楊x,係晚上處境劇做顧問律師嗰位,都係好有禮貌,黑黑實實,好正氣,佢聲線沉厚,我同佢講俾心機,睇好你呀!

議員都車過唔少,不個最記得有一次,喺銅鑼灣時代廣場排隊上客,係人龍度見到呢位議員,我心諗,千祈唔好接到佢,我一定拒載架。第一:我唔鍾意呢個人;第二:我怕佢不停同我講「answer me!answer me!」,我唔識答佢之餘,我驚我會趕佢落車就唔好啦。

請支持我們持續發展,透過PayPal或其他方法贊助我們!
金額:
分類:|發表於2014年7月27日 下午1:35

發表評論

讀取中…
楊軍網誌│我們失去了「主場」不等於沒有明天