雲闊天清網誌│怎樣更有理由要求削減自由行?

8仔笑爆│政壇驚心怪談四則

2014-8-6 23:36
字體: A A A

怪事年年有,今年不但特別多,而且特別重口味,尤其是政壇,更似強國人講廣東話「前面有妖孽」(前面有油入)一樣,真係特別多妖孽。

一講到怪談,事不離四,咁樣先至算得上係「四人夜話」。所以,8仔亦都秉承呢個優良傳統,一炮四響,湊足四則俾大家過下日辰,順便賀一賀陰曆七月十四出世嘅「海鮮鬼」689啦。

 

怪談一:田少何解連假普選都照殺?

近年樂於畀傳媒封為「建制派泛民」嘅富貴黨黨魁田大少喺8月3日星期日忽然之間話:「到底係半杯水,一杯水?真普選,假普選?我哋唔理,最緊要個個有得選一選先。」

田少之所以咁講,只有兩個理由:第一個係佢傻Q咗;第二個係佢收到強而有力嘅「溫馨提示」。

田少傻Q咗嘅可能性雖然存在,但係即使佢真係傻Q咗,佢啲黨友都可以幫佢補飛,但係佢啲黨友莫講話補飛,就連「飛劍」都冇吐過半篤出嚟,所以呢個可能性實在偏低。

而較為可信嘅係,佢收到強而有力嘅「溫馨提示」。

大家應該仲記得,日前田少就帶住富貴黨幾件黨友北上深圳,成為第一批獲身兼中央港澳工作協調小組組長的人大委員長張德江接見嘅香港政界人物,威過威士忌。

一般二流分析員都認為,田少好有可能畀張委員長訓示甚至訓斥,惟有扮死狗連假普選都支持。呢個講法,只係睇到表面嗰層皮,實情可能係田少受到「特務政治」對待。

大家千祈唔好淨係掛住怪偉大祖國引入特務政治,要怪都係要怪英國佬先。

8仔聽聞,2003年七一大遊行之後,田少轉軚反23條,即使畀港澳辦大叔面斥,甚至拍晒耛拍晒凳,依然唔肯「顧全大陸」。冇幾耐,就傳出一個驚天消息話,田少之所以會咁堅持,係因為英國特務009揸住佢啲黑材料,唔反23唔得,否則實聽執骨。

中共輸咗一場咁重要嘅特務戰,痛定思痛,自此之後就成立咗中央港澳工作協調小組,除咗統籌香港事務之外,更大量收集香港政客嘅情報。十一年下來,呢啲情報疊起上嚟高過國金二期。其中,自然包括田少嘅「快勞」在內。

所以,當張德江係咁咦提下「相關資料」,田少自然識do,而張委員長亦都立咗大功,可以同習總稱兄道弟囉,呵呵!

 

怪談二:林鄭幾乎攞到泛民四票

早排,林鄭接見咗「易話為先生」李國麟、「張文光替身」葉建源、「IT發達人」莫乃光,以及「識時務會計」梁繼昌,聽講相談甚歡,以至林鄭覺得,泛民呢四票,應該可以「袋住先」。殊不知,卻被「19-1學者」喝住,惟有喺個袋度拎番出嚟先,但就已經認為,呢趟有機會望到家鄉。更何況,仲有湯渣華、馮屈機、單雞呢三票呢!

 

怪談三:肥佬黎自編自導自演「捐款風波」

林鄭見泛民四子之後冇幾耐,就爆出肥佬黎「捐款風波」。於是乎就有人話,呢場風波好有可能係肥佬黎自編自導自演嘅,原因係佢想藉此捆綁泛民,等佢哋都知道,「特務政治」呢家嘢,唔係淨係中共識得玩,云云。

呢樣嘢有啲天方夜譚過要曾偉雄道歉。須知道,咁樣做,肥佬黎簡直同練「先傷己、後傷人」嘅七傷拳冇分別。肥佬黎咁「殊嘜」,應該唔會嘅。

不過,古語有云「世事無絕對,只有隊冧佢」,所以8仔亦都唔會排除呢個可能性,事關街邊真係日日都會發生「損人不利己」嘅事嘛陰功!

 

怪談四:習總開始睇番實香港

習總說到做到,果然老虎蒼蠅一起打,打到康師傅流水落花春去也,令美日英等外部勢力睇到佢真係有料到,紛紛踩「迫力」,暫時停止玩佢,睇定啲再算。而就係咁,習總就開始有時間揭吓嗰個鋪晒塵嘅「香港快勞」。

不揭猶自可,一揭就發現香港竟然會變成咁,一個揸住英國居留權嘅假洋鬼子,竟然可以咁核突咁轉軚,竟然仲可以領導一場億萬金元鉅製的愛國愛港反佔中運動,不禁學齊昕嘅母親一樣「倒抽一口涼氣」。

而家,你應該睇得明,何解今日反佔中大遊行籌委會喺各大報章刊登嘅全版廣告,周融個名竟然會排尾三啦(我冇寫錯,你冇睇錯,的而且確係排尾三)!

 

(原圖取自:《貞子纏身》電影劇照)

請支持我們持續發展,透過PayPal或其他方法贊助我們!
金額:
分類:|發表於2014年8月6日 下午11:36

發表評論

讀取中…
Eli Poon網誌│藝術是人間之鏡