林伯網誌│親身經歷的4次申辦牌照風波

伍模凸區│董建華大力金剛腿踢郁真普選

2014-9-3 22:02
字體: A A A

古語有云:「君子報仇,十年未晚!」更古嘅語亦有云:「君子報國,九年未晚!」做忍者做足九年嘅前特首董建華,以全國政協副主席呢個國家領導人嘅尊貴身份(尊貴到北上有車幫佢開路),喺充滿英國殖民地風情嘅前特首辦公室開棟篤企記招,顯示自己嘅腳痛已經好番,直頭好似練咗少林功夫好嘢好好嘢嘅大力金剛腿一樣,可以比以前更有力咁報效國家嘞!

董伯伯話:「到2017年,由全港市民一齊開拓波瀾壯闊嘅歷史……我哋點樣可以選擇原地踏步呢?使我哋嘅民主進程到此為止,唔係嗄話?由五百萬選民一人一票選出特首,是實質嘅民主,係一個貨真價實嘅民主!

嗱!大家再聽多一次,董伯伯話,人大常委會一錘定音嘅政改方案「係一個貨真價實嘅民主」。董伯伯係一個超級老實人,從來唔講大話,亦都冇甩過大牙,所以我伍模都好信佢老人家,尤其係我細細個就聽啲老香港講,「貨真價實」嘅下一句係「如假包換」。咁即係話,如果呢個係「假普選」,董伯伯就包保會換番個「真普選」俾你,你唔使慌!

所以話,如果中央係最大嘅民主派,咁董伯伯就係最老……資格嘅民主派;如果話人大決定係一嚿美玉,越睇越可愛,咁董伯伯嘅講話就係一嚿……東坡肉,越食越彈牙。

總之,到時到候,如果你發現手上嘅一票係假選票,而嗰個選舉亦都係假普選嘅話,咁就記得向董伯伯追數喇!你甚至可以拎住張摺凳一嘢車埋佢隻腳度,仲車一嘢就講一聲:「金剛腿吖嗱!金剛腿吖嗱!……」哈哈!真係越睇越可愛呀!

 

(原圖取自:蘋果日報)

 

(打手:伍模)

請支持我們持續發展,透過PayPal或其他方法贊助我們!
金額:
分類:|發表於2014年9月3日 下午10:02

發表評論

讀取中…
即時關注│三星中德同步發布多款產品 Edge手機破天荒邊框顯示