曼市狗舍遭縱火 53狗慘被燒死

讀者投稿|抗爭要等無私嘅聖人出現先可以參與?

2014-9-12 22:29
字體: A A A

有好多人唔參與香港依家嘅抗爭運動,佢哋嘅原因係覺得有好多人從中抽水,例如有人抽水爭選票,有人甚至叫人捐錢,無論建制同泛民都無人真心為民請命,去抗爭就等於為他人作嫁衣……我以前其實都有差唔多諗法,不過後來我嘅諗法改變咗。

如果大家要食一碗飯,有好多人已經係碗飯上面得益,例如係農夫同米商;我肯定,當中有好多人都唔係為咗食飯嘅人好,搞攪包米出嚟賣。但我哋會唔會為咗依個原因唔食飯呢?

好多人就會話食飯同抗爭點同,無得食會死架嘛!問題所在就係「點同」。如果有日政府唔管制米價,有商家炒到一千蚊一碗飯(假設無代替品),相信好多今日話人哋暴民政治嘅人,都會走出嚟抗議政府,即使抗議手法或者會犯法。食飯同依家嘅政治抗爭最大分別係,食飯對香港人係有即時利益關係,而政治抗爭的利益關係好似唔係咁貼身,甚至有人可能覺得同佢哋嘅利益無關。

我就試下簡單咁講一個關於依家經濟同政治關係嘅例子。好多外國大行(金融機構)要喺大陸投資, 點解佢哋會揀喺香港設立亞太區總部,而唔係直接係大陸設總部呢?唔通貪香港租平?

不如引述一下香港金融管理局嘅原因:係香港有「良好的法治體系和有效率的金融基礎設施。」

點解香港有良好的法治體系而咁多人對大陸嘅執法咁無信心呢?其中一個原因係我哋有三權分立,就係行政、立法、司法分權,並能夠互相監察。

假設我哋有日覺得執法不公(例如覺得被老屈),我哋可以向議員投訴甚至提出司法覆核。但係喺大陸,分分鐘可以由立法機構指使執法機構嚟拉你,依個制度就係大陸出現嚴重官官相護嘅其中原因。年前習近平叫香港「三權合作」,最近有人要法官愛國做管治工具,根本就係破壞緊香港人嘅利益,仲要係利益嘅本源。

當有人一再侵害我哋嘅利益,我哋仲係咪因為有人抽水而唔反抗入侵呢?我地係咪要等一個無私嘅聖人出現先至反抗呢?唔通你反抗成功會一啲着數都無?唔通大家覺得抗爭成功後大家都有着數,就大家都一齊繞埋對手攬炒?依個世界根本係無應唔應得依回事,而係只有你爭取唔爭取,當你自己連你需要嘅嘢都唔去爭取,人哋就只會當你湯圓咁搓圓禁扁咁任玩。

(撰文:陳假,成日發夢環遊世界但係又未鼓起勇氣嘅人)

請支持我們持續發展,透過PayPal或其他方法贊助我們!
金額:
分類:|發表於2014年9月12日 下午10:29

發表評論

讀取中…
8仔拆解│教廷「駐港大使」無外交豁免權 廉署理論上可憑法官手令搜查