即時關注:《人民日報》向港人發「招生通告」

Angelina

-空中飛傭

空中小姐,其實即係空中飛傭,只係一個在飛機上工作的傭工,你睇我好,我睇你好,其實是他也是你和我,打份工啫,得閒咪上嚟講吓是非囉。

Angelina網誌│空姐眼中的五大乘客惡行(四及五)

2014-1-18 09:43
字體: A A A

惡行之四:奉旨要毛氈枕頭

為咗張氈,你可以去到幾盡?

毛氈和枕頭,本身都是便宜的普通物品。但你又怎會想到,在飛機上,一個身穿Chanel套裝,舉止優雅的Miss Cheung、PR Manager陳生,竟然會為咗呢啲嘢不顧儀態,甚至破口大罵?

如果你仲覺得,我俾咁多錢搭飛機,毛氈、枕頭、報紙及有得揀餐是天公地道的話,咁我建議你改搭私人飛機。

大家有眼睇,近幾年機票愈來愈平,為了節省成本,航空公司除了簡化服務外,也會減少機上非必需品的數量。而首當其衝的,當然是又要洗又要摺又要入膠袋的毛氈,以及同樣麻煩的枕頭。

再者,如果大家知道毛氈和枕頭的秘密,應該都唔會再爭住要。

沙士前,回程航班上的毛氈,其實就是去程航班上用過的那些,只是摺好再派過,即使商務艙都一樣。沙士後,因為衛生問題,終於不會再派二手毛氈,但有時夏天仍會供不應求,航空公司久不久就會故態復萌。

即使不是二手,也不代表毛氈一定乾淨。別人的頭髮固然是常見,我就曾聽說毛氈上有嘔吐物漬及香口膠等。至於枕頭更可怕,我根本未見過有職員會換枕頭與枕頭套,都唔知俾人用過幾多次!

所以,要有肌膚之親的物品,下次還是自備吧!

惡行之五:不適當的時候去廁所

一、 派餐的時候去廁所

我哋的餐車200幾磅重,推出去時已經身水身汗。如果遇到客人喺我哋派餐的時候去廁所,要我哋推出推入讓俾佢去,一來派的速度好慢,二來我哋會好鬼累,三來,亦是最重要的一點,你可能會失去揀餐的機會。

二、 起飛/降落/有氣流/滑行中去廁所

起飛降落時看似平穩安全,其實係最容易有意外的critical moment。呢個時候連空姐都必須坐回crew seat,緊扣安全帶。但當遇上唔識死的乘客(尤其是小朋友)硬要去廁所,我哋唯有用廣播叫乘客坐埋位,吸引全機人的注視以向這位廁所怪施壓。這樣令人很樣衰?都好過冇咗條命啦!

至於有氣流和滑行時去到廁所的人,我都要寫個服字俾佢。在如此顛簸的情況下仍能保持雙腳乾爽,準確無誤,成功如廁,霸氣!

P.S. 最佳廁所位:上機後立刻去(廁所仲未俾人污染,係最乾淨的時候)、收餐後及降落前。(Angelina)

(網絡圖片,其實自己帶埋個枕頭咪幾好,起碼肯定乾淨,又舒服啲,你睇吓個鬼妹幾開心)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年1月18日 上午9:43

發表評論

讀取中…
丘偉華網誌│梁振英‧崇禎帝