言輕網誌│想起一部蘇格蘭電影:《智取威士忌》(The Angels’ Share)

8仔筆記│隱世股神評馬雲上市工程

2014-9-19 22:42
字體: A A A

今日,呢個藍色星珠有兩單大新聞,一單係蘇格蘭獨立公投,一單係阿巴里里喺紐交所上市。蘇格蘭獨立公投令前前英國首相白高敦成為「保統英雄」,阿里巴巴上市令中國首富馬雲成為「華爾街神話」。不過,講到馬雲呢個「新香港人」,佢早幾日喺香港嘅路演,就令到一位城中「隱世股神」忍唔住喺中環蓮香樓,一邊食住個雞球大包,一邊狂讚馬雲好神。

呢位隱世股神叫波叔,佢話馬雲左一句「I speak from my heart, I love Hong Kong.」(講心嗰句:我愛香港),右一句「有人說,香港失去了阿里巴巴的一個機會,我自己覺得是阿里巴巴錯失了香港,很遺憾」,可謂冧盡港人心。但其實,波叔就覺得,智商、情商、逆商都肯定爆晒燈嘅馬雲,如果真係想喺香港上市,點可能唔OK呢又?

波叔猜想,馬雲day one就唔係好想喺香港上市,但係如果一開始就話要去美帝個場敲鐘,咁就有「政治不正確」嘅嫌疑。於是乎,佢就先喺香港搞場大龍鳳,假鳳虛凰一番,搞到港交所冇辦法俾阿里巴巴上市,跟手就以忍著淚說goodbye嘅姿態,走去華爾街另謀出路。總之就好似「小李飛刀」李尋歡咁,慨嘆「對不起,我愛你」,「我真的愛你,可惜不能和你在一起」。

波叔仲話,喺美國上市,最大嘅好處係啲錢一步到位,唔使經香港「轉口」咁叉麻煩,情形就好似玩「大富翁」遊戲咁,一開始就直接由「起點」直達「終點」,既唔使俾買路錢(過路費),又唔使俾人抽水(稅),更加唔使因為俾人查而一個唔覺意要入獄,可謂梳乎過食太平館梳乎里。如果考慮埋阿里巴巴嘅資金背景,馬雲呢招就更加妙不可言,簡直妙過巴西經典左腳王李維連奴嘅腳趾尾拉西!

8仔聽到呢度,啱啱咬住嘅嗰條臘腸卷就即刻標咗啲汁出嚟。當然,波叔都係斷估,大家當茶餘飯後嘅吹水古仔睇睇就算喇(不過,如果閣下想複述俾啲豬朋狗友聽,細佬前車可鑑,千祈唔好趁人哋食緊臘腸卷先至講呀,好嘛?)!

 

(原圖取自:蘋果日報)

請支持我們持續發展,透過PayPal或其他方法贊助我們!
金額:
分類:|發表於2014年9月19日 下午10:42

發表評論

讀取中…
讀者投稿|從兒童權利公約看罷課與佔中