iPhone有嘢玩  iOS 8新鍵盤把文字變圖像

8仔筆記│罷課係咪值得? 阿松問錯問題!

2014-9-20 19:49
字體: A A A

古語有云「一石激起千重浪,一班學生就激到中共心慌慌」,搞到阿豬阿狗都要搵機會企出嚟護航,而最新登場嘅,就係人稱「阿松」嘅前財爺梁錦松。

話說阿松同一班大專及中學生對話,期間有學生問佢點睇年輕人被指係被慫恿參與罷課爭取普選,佢就話唔可以低估而家做出嚟嘅事對將來嘅影響,仲反問大家付出嘅嘢係咪值得。

唔好意思,阿松,你問錯問題喇!你問「值唔值得」,係一個「功利問題」。通常,呢類問題用嚟問啲為口奔馳嘅中坑中女都叫做有啲用,亦即係話呢類問題頂櫳可以用嚟問家長,用嚟問班仲未俾社會大學蹂躪到體無完膚嘅後生仔女,簡直係同問佢哋做義工係咪值得一樣咁膠!

而真正嘅問題唔係「值唔值得」,而係「應唔應該」!

「值唔值得」係「功利問題」,「應唔應該」係「道德問題」。做中坑中女或者真係唔可以唔講「功利」,但係做人(尤其係做學生)就更加唔可以唔講「道德」,除非阿松自己冇乜道德,咁8仔就冇嘢好講嘞。

好喇,而家個問題係:「罷課係咪應該做嘅呢?」

如果你都認為人大落閘真係好離譜好粗暴,答案,其實已經寫在黑板上,寫在壁報板上,甚至寫在學校禮堂講台後面嘅嗰幅高牆上!

 

(原圖取自:蘋果日報)

請支持我們持續發展,透過PayPal或其他方法贊助我們!
金額:
分類:|發表於2014年9月20日 下午7:49

發表評論

讀取中…
即時關注│康文署否決民陣「十一」示威維園起步